परभणीत गांजा प्रकरणातील फरार आरोपी जिंतुरातून जेरबंद

स्थानिक गुन्हे शाखेची कारवाई; आरोपी जिंतूर पोलीसांच्या स्वाधीन

परभणी (Parbhani Ganja Case) : जिंतूर तालुक्यातील एनडीपीएस (गांजा) प्रकरणातील फरार आरोपीला परभणी स्थानिक गुन्हे शाखेच्या पथकाने जिंतूर शहरातून अटक केली. गुप्त माहितीच्या आधारे मध्यरात्री करण्यात आलेल्या या कारवाईमुळे पोलिसांना महत्त्वाचे यश मिळाले आहे. पोलिसांकडून मिळालेल्या माहितीनुसार, स्थानिक गुन्हे शाखेचे पथक शुक्रवारी पहाटे सुमारे १२.१० वाजता जिंतूर शहर व परिसरात गस्त घालत होते. यावेळी जिंतूर पोलीस ठाण्यात दाखल गुन्हा क्रमांक २७६/२०२६ मधील फरार आरोपी अभिजीत उर्फ बिल्ली सुभाष राठोड (वय ३०, रा. गणपती गल्ली, जिंतूर) हा त्याच्या राहत्या घरी आल्याची माहिती गुप्त बातमीदारामार्फत पोलिसांना मिळाली. माहितीची खातरजमा केल्यानंतर स्थानिक गुन्हे शाखेच्या पथकाने गणपती गल्ली परिसरात धाव घेतली.

आरोपीला संशय येऊ न देता परिसरात सापळा रचण्यात आला. त्यानंतर (Parbhani Ganja Case) पोलिसांनी शिताफीने कारवाई करून आरोपीला ताब्यात घेतले. अटक करण्यात आलेला आरोपी एनडीपीएस कायदा १९८५ अंतर्गत कलम २०(ब), २(ब) व २२ अन्वये दाखल गुन्ह्यात फरार होता. आरोपीला पुढील तपास व कायदेशीर कार्यवाहीसाठी जिंतूर पोलीस ठाण्याच्या स्वाधीन करण्यात आले आहे. पोलीस अधीक्षक पंकज कुमावत यांच्या आदेशानुसार व स्थानिक गुन्हे शाखेचे पोलीस निरीक्षक गजेंद्र सरोदे यांच्या मार्गदर्शनाखाली ही कारवाई करण्यात आली.

या पथकात सहाय्यक पोलीस निरीक्षक जायभाये तसेच पोलीस अंमलदार सिद्धेश्वर चाटे, नामदेव डुबे, राम पोळ, सूर्यकांत फड, विलास सातपुते, मुकेश बुधवंत, पांडुरंग तूपसुंदर आणि चालक शहाणे यांचा सहभाग होता. (Parbhani Ganja Case) फरार आरोपीला जेरबंद करण्यात स्थानिक गुन्हे शाखेला मिळालेले हे यश जिल्हा पोलिसांच्या  गुन्हेगारां विरोधातील विशेष मोहिमेचा भाग मानले जात आहे.