मा सु पा महाविद्यालयात आंतरराष्ट्रीय योग दिन उत्साहात साजरा

मानोरा (International Yoga Day) : स्थानिक मातोश्री सुबद्राबाई पाटील कला, विज्ञान व कै. पांडुरंगजी ठाकरे महाविद्यालयात दि. २१ जून रोजी आंतरराष्ट्रीय योग दिन उत्साहपूर्ण वातावरणात साजरा करण्यात आला. यानिमित्त महाविद्यालयातील प्राध्यापक व शिक्षकेतर कर्मचाऱ्यांनी विविध योगासने व प्राणायाम करून योगाचे महत्त्व अधोरेखित केले.
     
या (International Yoga Day) कार्यक्रमाचे अध्यक्षस्थान महाविद्यालयाचे सचिव  महादेवराव ठाकरे यांनी भूषविले. त्यांनी आपल्या अध्यक्षीय भाषणात योग हा निरोगी जीवनाचा पाया असून शारीरिक व मानसिक आरोग्यासाठी योगाचे महत्त्व अनन्यसाधारण असल्याचे प्रतिपादन केले. यावेळी महाविद्यालयाचे प्राचार्य डॉ. सोपान इंगोले यांनी उपस्थितांना संबोधित करताना नियमित योगाभ्यासामुळे शारीरिक तंदुरुस्ती, मानसिक शांतता व कार्यक्षमतेत वाढ होते, असे सांगून दैनंदिन जीवनात योगाचा अंगीकार करण्याचे आवाहन केले. या प्रसंगी योगशिक्षक पंकज राऊत यांनी उपस्थितांना विविध योगासने, प्राणायाम व ध्यानाच्या पद्धतींचे मार्गदर्शन केले. त्यांनी योगाचे शारीरिक, मानसिक व आध्यात्मिक आरोग्यावरील सकारात्मक परिणाम स्पष्ट करून नियमित योगाभ्यासाचे महत्त्व पटवून दिले. त्यांच्या मार्गदर्शनाखाली सर्व उपस्थितांनी योगासने व प्राणायामाचा सराव केला.

शारीरिक शिक्षक प्रा. गजानन पाटील, राष्ट्रीय सेवा योजना कार्यक्रम अधिकारी डॉ. किशोर कोपरकर व महिला कार्यक्रम अधिकारी प्रा. स्नेहल ढवळे यांनी सहसंयोजक म्हणून कार्यक्रम यशस्वीरीत्या पार पाडला. कार्यक्रमात उपस्थित सर्व कर्मचाऱ्यांनी नियमित योगाभ्यास करण्याचा संकल्प केला. कार्यक्रमाच्या यशस्वी आयोजनाबद्दल उपस्थितांनी संयोजकांचे अभिनंदन केले.