दुष्काळाच्या सावटामुळे विष्णुपंत भुतेकर यांचा वाढदिवसाचे जाहीर कार्यक्रम रद्द!

वाढदिवस साधेपणाने साजरा होणार; संचालक रवींद्र चोपडे यांचे आवाहन

रिसोड (Vishnupant Bhutekar) : भूमीपुत्र शेतकरी संघटनेचे संस्थापक अध्यक्ष तथा रिसोड कृषी उत्पन्न बाजार समितीचे सभापती श्री. विष्णुपंत भुतेकर यांच्या वाढदिवसानिमित्त आयोजित केले जाणारे सर्व जाहीर व सामाजिक कार्यक्रम यंदा रद्द करण्यात आले आहेत. परिसरात पावसाअभावी शेतकरी बांधव कोरड्या दुष्काळाच्या तीव्र संकटात सापडले असल्याने, बळीराजाच्या दुःखात सहभागी होत हा संवेदनशील निर्णय घेण्यात आला आहे.

​विष्णुपंत भुतेकर (Vishnupant Bhutekar) यांच्या वाढदिवसानिमित्त दरवर्षी विविध सामाजिक उपक्रम, आरोग्य तपासणी शिबिरे व सत्कार सोहळ्यांचे मोठ्या प्रमाणावर आयोजन केले जाते. मात्र, यंदा शेतात गंभीर दुष्काळी परिस्थिती निर्माण झाल्याने कोणताही उत्सव किंवा सोहळा साजरा न करण्याचा निर्णय भुतेकर यांनी घेतला आहे. त्यानुसार वाढदिवसानिमित्त होणारे सर्व कार्यक्रम व आरोग्य शिबिरे रद्द करण्यात आली आहेत.

​वाढदिवसाच्या दिवशी केवळ शेतकरी, कार्यकर्ते आणि नागरिकांच्या शुभेच्छा व आशीर्वाद स्वीकारण्यासाठी भुतेकर हे दिवसभर कृषी उत्पन्न बाजार समिती, रिसोड येथे उपस्थित राहतील. सर्व हितचिंतक, कार्यकर्ते, संस्था व मित्रमंडळांनी या निर्णयाची नोंद घ्यावी; वाढदिवसानिमित्त कोणत्याही प्रकारचे हार-तुरे, स्वागत सोहळे किंवा डिजिटल फलक उभारू नयेत, असे आवाहन भूमीपुत्र शेतकरी संघटनेचे जिल्हा उपाध्यक्ष तथा कृषी उत्पन्न बाजार समितीचे संचालक रवींद्र चोपडे यांनी प्रसिद्धीपत्रकाद्वारे केले आहे.