वसंत डावखरे मानहानी प्रकरणाचा 17 वर्षांनी निकाल; उद्धव ठाकरे आणि एकनाथ शिंदे यांची निर्दोष सुटका.
2009च्या लोकसभा निवडणुकीतील कथित व्हिडीओ प्रकरण; 20 पेक्षा अधिक साक्षीदारांची साक्ष, दोन्ही नेत्यांचे VCद्वारे जबाब
मुंबई : दिवंगत नेते वसंत डावखरे यांनी दाखल केलेल्या 17 वर्षे जुन्या मानहानी प्रकरणाचा अखेर निकाल लागला आहे. या प्रकरणात माजी मुख्यमंत्री उद्धव ठाकरे आणि महाराष्ट्राचे उपमुख्यमंत्री एकनाथ शिंदे यांची न्यायालयाने निर्दोष सुटका केली आहे. या खटल्यात 20 पेक्षा अधिक साक्षीदारांच्या साक्षी नोंदवण्यात आल्या होत्या. तसेच उद्धव ठाकरे आणि एकनाथ शिंदे यांचे जबाब व्हिडीओ कॉन्फरन्सिंगद्वारे नोंदवण्यात आले होते.
या प्रकरणाची सुरुवात 2009च्या लोकसभा निवडणुकीच्या पार्श्वभूमीवर झाली होती. त्यावेळी कल्याण लोकसभा मतदारसंघात राष्ट्रवादी काँग्रेसचे वसंत डावखरे आणि आनंद परांजपे यांच्यात निवडणूक लढत झाली होती. प्रचारादरम्यान उद्धव ठाकरे यांनी आनंद परांजपे यांच्या समर्थनार्थ आयोजित सभेत वसंत डावखरे यांचा कथित व्हिडीओ दाखवला होता.
या व्हिडीओमध्ये डावखरे कार्यकर्त्यांना निवडणूक जिंकण्यासाठी पोलिस आणि निवडणूक अधिकाऱ्यांची भीती न बाळगता प्रयत्न करण्याचे आवाहन करत असल्याचे दाखवण्यात आले होते. मात्र, डावखरे यांनी या व्हिडीओतील वक्तव्य नाकारले होते आणि व्हिडीओ मॉर्फ करण्यात आल्याचा दावा केला होता.
यानंतर वसंत डावखरे यांनी उद्धव ठाकरे, एकनाथ शिंदे, आनंद परांजपे आणि रमाकांत देवळेकर यांच्याविरोधात मानहानीची तक्रार दाखल केली. या प्रकरणाचा खटला कल्याण न्यायालयात सुरू राहिला. वसंत डावखरे यांचे 2018 मध्ये निधन झाले, मात्र त्यानंतरही न्यायालयीन प्रक्रिया सुरू राहिली.
खटल्याच्या अंतिम टप्प्यात उद्धव ठाकरे आणि एकनाथ शिंदे यांचे जबाब कलम 313 अंतर्गत नोंदवण्यात आले. दोघांनीही त्यांच्यावर करण्यात आलेले आरोप नाकारले होते. ऑगस्ट 2026 मध्ये दोन्ही नेत्यांचे जबाब व्हिडीओ कॉन्फरन्सिंगद्वारे नोंदवण्यात आले होते.
आता या दीर्घकाळ चाललेल्या प्रकरणाचा अंतिम निकाल समोर आला असून उद्धव ठाकरे आणि एकनाथ शिंदे यांची निर्दोष सुटका करण्यात आली आहे.