लोणावळा (Tourist Rush) : महाराष्ट्रातील लोणावळ्याजवळील ऐतिहासिक लोहगड किल्ला हा आपल्या समृद्ध मराठा इतिहासासाठी आणि पावसाळी ट्रेकसाठी प्रसिद्ध आहे. मात्र, पुण्यातील रिअल इस्टेट व्यावसायिक केतन अग्रवाल यांच्या गाजलेल्या हत्या प्रकरणानंतर या किल्ल्याकडे पर्यटकांचा ओढा अनपेक्षितपणे वाढला आहे. अनेक पर्यटक आता इतिहास किंवा निसर्गसौंदर्यापेक्षा केतन अग्रवाल यांना ज्या कड्यावरून ढकलण्यात आले, तो परिसर पाहण्यासाठी लोहगडावर येत असल्याचे स्थानिकांनी सांगितले आहे.
लोहगड- विसापूर विकास मंचाचे अध्यक्ष सचिन टेकावडे यांनी सांगितले की, गेल्या पाच दिवसांत किल्ल्यावर येणाऱ्या पर्यटकांच्या संख्येत लक्षणीय वाढ झाली आहे. यंदा पावसाला उशिरा सुरुवात झाल्यामुळे जून महिन्यात पर्यटकांची संख्या घटली होती. मात्र, हत्या प्रकरण उघडकीस आल्यानंतर अनेकजण विशेषतः त्या घटनेशी संबंधित ठिकाण पाहण्यासाठी किल्ल्यावर येत आहेत.
टेकावडे यांनी सांगितले की, लोहगड हा ऐतिहासिक वारसा आणि निसर्गरम्य वातावरणासाठी ओळखला जातो. परंतु सध्या पर्यटकांकडून वारंवार हत्या घडलेल्या ठिकाणाबाबत चौकशी केली जात आहे. गेली जवळपास दोन दशके किल्ला आणि परिसराच्या विकासासाठी काम करणाऱ्या टेकावडे यांनी या परिस्थितीबद्दल खंत व्यक्त करत, किल्ल्याचा समृद्ध इतिहास गुन्हेगारी घटनेमुळे झाकोळला जात असल्याचे म्हटले.
सामान्यतः पावसाळ्यात शनिवारी आणि रविवारी सुमारे १० हजार पर्यटक, तर आठवड्याच्या इतर दिवशी ८०० ते १,००० पर्यटक लोहगडावर येतात. मात्र यंदा कमी पावसामुळे पर्यटकांची संख्या घटली होती. स्थानिकांच्या मते, अलीकडील वाढ ही थेट केतन अग्रवाल हत्या प्रकरणामुळे निर्माण झालेल्या उत्सुकतेचा परिणाम आहे.
किल्ल्यावर काम करणाऱ्या कर्मचाऱ्यांनीही सांगितले की, अनेक पर्यटक थेट केतन अग्रवाल यांना ज्या कड्यावरून ढकलण्यात आले, त्या जागेचा मार्ग विचारतात. काही पर्यटकांनी तर त्या ठिकाणाला अनौपचारिकपणे "सिया पॉइंट" असे संबोधण्यासही सुरुवात केली आहे.
या घटनेमुळे मुंबई, पुणे आणि नाशिकसह महाराष्ट्रातील विविध भागांतून पर्यटक लोहगडावर पोहोचत आहेत. नाशिकहून आलेल्या सिद्धेश या २१ वर्षीय तरुणाने सांगितले की, त्यांचा मूळ ट्रेकचा बेत कसारा घाट परिसरात होता. मात्र, लोहगड प्रकरणाची माहिती मिळाल्यानंतर त्यांनी आपला बेत बदलून लोहगड गाठला.
मुंबईहून आलेल्या वरद या पर्यटकानेही सांगितले की, त्याच्या मित्रांमध्ये या हत्या प्रकरणाची मोठी चर्चा सुरू होती. त्यामुळे ही घटना नेमकी ज्या ठिकाणी घडली, ते ठिकाण पाहण्याची उत्सुकता असल्याने त्यांनी लोहगडला भेट दिली.
सह्याद्री पर्वतरांगेत सुमारे ३,३८९ फूट उंचीवर वसलेला लोहगड किल्ला हा महाराष्ट्रातील महत्त्वाच्या गडांपैकी एक मानला जातो. मराठा लष्करी वारसा (Maratha Military Landscapes) या युनेस्कोच्या जागतिक वारसा यादीत समाविष्ट असलेल्या किल्ल्यांपैकी तो एक आहे.
इतिहासकार पांडुरंग बलकवडे यांच्या मते, लोहगडाचा इतिहास जवळपास दोन हजार वर्षांपूर्वीच्या सातवाहन काळापर्यंत पोहोचतो. पुढे चालुक्य, यादव, बहामनी अशा विविध राजवटींनी या किल्ल्यावर राज्य केले. १६३७ मध्ये आदिलशाहीच्या ताब्यात गेलेल्या या किल्ल्यावर १६५७ मध्ये छत्रपती शिवाजी महाराजांनी स्वराज्याचा झेंडा फडकावला. १६६५ च्या पुरंदर तहानंतर तो मुघलांच्या ताब्यात गेला; मात्र १६७० मध्ये मराठ्यांनी तो पुन्हा जिंकला. पेशव्यांच्या काळात लोहगड हा खजिना आणि महत्त्वाचा लष्करी तळ म्हणून वापरण्यात येत होता.
मात्र आज या ऐतिहासिक वारशापेक्षा केतन अग्रवाल हत्या प्रकरणाचीच चर्चा अधिक होत असल्याचे चित्र दिसून येत आहे.
उल्लेखनीय म्हणजे, २६ वर्षीय रिअल इस्टेट व्यावसायिक केतन अग्रवाल यांचा १८ जून रोजी लोहगड किल्ल्यावर ट्रेकदरम्यान ३५० फूट खोल दरीत ढकलून खून करण्यात आला होता. सुरुवातीला हा अपघाती मृत्यू असल्याचे समोर आले होते. मात्र तपासात हा पूर्वनियोजित कट असल्याचे निष्पन्न झाले. पोलिसांच्या तपासानुसार, त्यांची मंगेतर सिया गोयल आणि तिचा प्रियकर चेतन चौधरी यांनी केतनसोबत लग्न टाळण्यासाठी हा कट रचून त्यांची हत्या केल्याचा आरोप आहे.
