कारपेट व सीलकोट उखडल्याने ग्रामस्थांमध्ये नाराजी; भविष्यात कामे देण्यास प्रतिबंध करण्याचीही मागणी
मानोरा : तालुक्यातील मौजे गिरोली ते कारपा या रस्ता सुधारणेचे काम निकृष्ट दर्जाचे झाल्याचा प्रकार समोर आला आहे. रस्त्यावरील कारपेट आणि सीलकोट पूर्णपणे उखडल्याने या कामाच्या गुणवत्तेवर प्रश्नचिन्ह निर्माण झाले आहे. कंत्राटदाराने दोष दूर करण्यास नकार दिल्याने त्यांच्यावर तातडीने दंडात्मक प्रशासकीय कारवाई करावी, तसेच भविष्यात कामे देण्यास प्रतिबंध घालावा, अशी शिफारस जि.प. बांधकाम उपविभाग, कारंजा यांनी वाशिम जिल्हा परिषदेच्या कार्यकारी अभियंत्यांकडे केली आहे.
मौजे गिरोली ते कारपा (ग्रा.मा. ७९, किमी ०/३०० ते १/३००) या रस्ता सुधारणा कामाचा कार्यारंभ आदेश मंगरूळपीर तालुक्यातील कंझारा येथील कंत्राटदार सुमित सुनिल हरणे यांच्या नावे देण्यात आला होता. मात्र, काम करताना आवश्यक दर्जा राखला गेला नसल्याने रस्त्यावरील कारपेट आणि सीलकोट मोठ्या प्रमाणात उखडले आहे.
या कामाचा दोष दायित्व निवारण कालावधी २७ फेब्रुवारी २०२७ पर्यंत आहे. या कालावधीत रस्त्याची दुरुस्ती करून काम योग्य स्थितीत ठेवण्याच्या सूचना कंत्राटदाराला वारंवार देण्यात आल्या. मात्र, संबंधित कंत्राटदाराने अद्याप दोष दूर केले नसून विभागाशी कोणताही प्रतिसाद दिलेला नसल्याचे नमूद करण्यात आले आहे.
ग्रामस्थांचा उपोषणासह आत्मदहनाचा इशारा
रस्त्यावरील दोषांची दुरुस्ती अद्याप न झाल्याने गिरोली परिसरातील ग्रामस्थांमध्ये नाराजी वाढली आहे. प्रहार दिव्यांग संघटनेचे मानोरा तालुकाध्यक्ष संतोष वसराम राठोड (रा. पिंप्री हनुमान, पो. गिरोली) यांनी या प्रश्नावर उपोषण करण्याचा आणि प्रसंगी आत्मदहन करण्याचा इशारा दिला आहे.
कंत्राटदारावर कारवाईची मागणी
कंत्राटदाराचा असहकार आणि ग्रामस्थांचा वाढता रोष लक्षात घेऊन जि.प. बांधकाम उपविभाग, कारंजाचे उपअभियंता यांनी १८ फेब्रुवारी २०२६ रोजी वाशिम जिल्हा परिषदेच्या कार्यकारी अभियंत्यांकडे अहवाल सादर केला. पत्र क्र. १५०/२०२६ अन्वये सादर करण्यात आलेल्या या अहवालात कंत्राटदार सुमित सुनिल हरणे यांच्यावर तातडीने दंडात्मक कारवाई करण्याची मागणी करण्यात आली आहे.
तसेच, जि.प. बांधकाम विभागांतर्गत भविष्यात संबंधित कंत्राटदाराला कामे देऊ नयेत, यासाठी प्रतिबंधात्मक कारवाई (ब्लॅकलिस्ट) करण्याची स्पष्ट शिफारसही करण्यात आली आहे.
