वेलतूर (Officer Attack) : अवैध मुरूम उत्खननावर कारवाई करणाऱ्या कुही तहसीलचे नायब तहसीलदार बुद्धभूषण निकाळजे यांच्यावर जीवघेणा हल्ला झाल्याची धक्कादायक घटना उघडकीस आली आहे. त्यांना चिरडण्याचा प्रयत्न करण्यात आला तसेच जेसीबीवरून फेकण्याचाही प्रयत्न करण्यात आला. ही घटना वेलतूर पोलीस स्टेशन अंतर्गत बोरी नाईक येथे मंगळवारी रात्री साडेअकराच्या सुमारास घडली.
मिळालेल्या माहितीनुसार, नायब तहसीलदार निकाळजे व त्यांच्या महसूल पथकाला या परिसरात जेसीबीच्या साहाय्याने दोन ट्रॅक्टरमध्ये अवैध मुरूम उत्खनन सुरू असल्याचे निदर्शनास आले. पथकाला पाहताच ट्रॅक्टर चालकाने निकाळजे यांच्या अंगावर ट्रॅक्टर चालवण्याचा प्रयत्न केला. मात्र प्रसंगावधान राखल्याने त्यांचा जीव थोडक्यात बचावला. त्यानंतर अंधाराचा फायदा घेत ट्रॅक्टर चालक घटनास्थळावरून पसार झाला.
दरम्यान, एमएच 40 सिकु 23 88 क्रमांकाच्या जेसीबीला पकडण्याचा प्रयत्न करत असताना चालकाने जेसीबी वेगाने पळवली. यावेळी नायब तहसीलदार थेट जेसीबीवर चढले. मात्र चालकाने गाडी न थांबवता रस्त्याच्या कडेला असलेल्या काटेरी झाडांकडे वारंवार वळवत त्यांना खाली फेकण्याचा प्रयत्न केला. या दरम्यान जेसीबीला लटकलेल्या नायब तहसीलदारांना तब्बल तीन ते चार किलोमीटरपर्यंत फरफटत नेण्यात आले.
या संपूर्ण घटनेचा नायब तहसीलदारांनी थेट लाईव्ह व्हिडिओ केला असल्याने माहिती वाऱ्यासारखी पसरली. त्यानंतर पोलीस पथकाने वेळीच हस्तक्षेप करत जेसीबी थांबवली आणि मोठा अनर्थ टळला.
या प्रकरणी भारतीय न्याय संहिता कलम 303 (2), 68, 132, 221, 121 (1), 109 तसेच सहकलम 48 (7), 48 (8) यांसह महाराष्ट्र जमीन महसूल अधिनियम व पर्यावरण संरक्षण अधिनियम अंतर्गत गुन्हा दाखल करण्यात आला आहे. वेलतूर पोलिसांनी आरोपी जेसीबी चालकाला अटक केली असून पुढील तपास सुरू आहे.
