परभणी (Murder Case) : जिंतूर तालुक्यातील धानोरा देवगाव येथे दारूच्या पैशांच्या वादातून पत्नीची लोखंडी रॉडने हत्या केल्याच्या प्रकरणातील मुख्य आरोपी पतीला जिंतूर न्यायालयाने दोन दिवसांची पोलीस कोठडी सुनावली आहे. तर आरोपीचे वडील आणि भावाला न्यायालयीन कोठडी देण्यात आली आहे.
बोरी पोलीस ठाण्याच्या हद्दीतील धानोरा देवगाव येथे गुरुवार (२५ जून) रोजी दुपारच्या सुमारास गजानन ज्ञानेश्वर कुटे याने दारूच्या पैशांच्या कारणावरून पत्नीची लोखंडी रॉडने डोक्यात वार करून हत्या केल्याचा आरोप आहे. घटना घडल्यानंतर आरोपी घटनास्थळावरून फरार झाला होता.
या घटनेनंतर कळमनुरीचे शिवसेना (शिंदे गट) आमदार संतोष बांगर यांचे नातू नाना बांगर तसेच मृत महिलेच्या नातेवाईकांनी आरोपीला अटक होईपर्यंत मृतदेह ताब्यात घेण्यास नकार देत आक्रमक भूमिका घेतली होती.
यानंतर सहाय्यक पोलीस निरीक्षक रामेश्वर धोंडगे यांच्या मार्गदर्शनाखाली बोरी पोलिसांनी तपासाची चक्रे फिरवत मुख्य आरोपी गजानन ज्ञानेश्वर कुटे याच्यासह त्याचे वडील ज्ञानेश्वर कुटे आणि भाऊ देवानंद कुटे यांना ताब्यात घेऊन अटक केली.
शुक्रवार (२६ जून) रोजी आरोपींना जिंतूर न्यायालयात हजर करण्यात आले. न्यायालयाने मुख्य आरोपी गजानन ज्ञानेश्वर कुटे याला दोन दिवसांची पोलीस कोठडी सुनावली, तर त्याचे वडील ज्ञानेश्वर कुटे आणि भाऊ देवानंद कुटे यांना न्यायालयीन कोठडी सुनावली.
दरम्यान, या प्रकरणातील चौथा आरोपी सुदाम कुटे अद्याप फरार असून, त्याचा शोध पोलीस घेत आहेत.
