वाशिमच्या मसाल गावात शेतकऱ्यांशी संवाद; पीक, पाणी आणि पशुधनाच्या समस्या जाणून घेतल्या, विम्याचे प्रश्न सोडवण्याचेही आश्वासन
वाशिम : दुष्काळसदृश परिस्थितीचा आढावा घेण्यासाठी मुख्यमंत्री देवेंद्र फडणवीस यांच्या पाहणी दौऱ्याला वेग आला आहे. लातूरनंतर आता वाशिममधील मसाल गावात पोहोचून त्यांनी शेतकऱ्यांशी थेट संवाद साधला. शेतकऱ्यांनी पीक नुकसान, पाण्याची टंचाई आणि जनावरांच्या चाऱ्याच्या समस्यांसह विविध अडचणी मुख्यमंत्र्यांसमोर मांडल्या. यावेळी सरकार शेतकऱ्यांच्या पाठीशी असून कोरड्या दुष्काळासंदर्भात शासन निर्णय काढण्यात येईल, असे फडणवीस यांनी सांगितले.
मसाल गावात मुख्यमंत्र्यांना भेटण्यासाठी शेतकऱ्यांची मोठी गर्दी झाली होती. काही शेतकऱ्यांनी त्यांना निवेदने दिली, तर काहींनी आपल्या अडचणी थेट सांगितल्या. शेतीतील नुकसान, पाण्याची उपलब्धता आणि जनावरांवरील संकट याबाबत शेतकऱ्यांनी व्यथा मांडल्या. फडणवीस यांनी त्यांचे म्हणणे ऐकून घेत प्रत्येकाशी संवाद साधला आणि मदतीचे आश्वासन दिले.
ताफा थांबवून शेतकऱ्यांशी संवाद
पाहणी आटोपून मुख्यमंत्री ताफ्यासह पुढे जात असताना रस्त्याच्या कडेला उभ्या असलेल्या शेतकऱ्यांनी हात उंचावून त्यांचे लक्ष वेधले. त्यानंतर फडणवीस यांनी ताफा थांबवून शेतकऱ्यांशी पुन्हा संवाद साधला. कोरड्या दुष्काळासंदर्भातील GR काढण्याबरोबरच पीक विम्याशी संबंधित प्रश्न सोडवण्यासाठीही प्रयत्न केले जातील, असे त्यांनी यावेळी सांगितले.
राज्यातील दुष्काळसदृश परिस्थितीवर सरकारकडून उपाययोजना सुरू असल्याचे फडणवीस यांनी यापूर्वीही सांगितले आहे. लातूर दौऱ्यात त्यांनी दुष्काळी मदतीसाठी शासन निर्णय लवकरच काढण्याचे आश्वासन दिले होते.
कर्जमाफीपासून वंचित शेतकऱ्यांनाही मदत
२०१६-१७ मधील कर्जमाफीच्या प्रक्रियेत जे शेतकरी लाभापासून वंचित राहिले, त्यांनाही मदत करण्याची घोषणा फडणवीस यांनी केली. सरकार त्यांच्या पाठीशी असल्याचे त्यांनी शेतकऱ्यांना सांगितले. या घोषणेनंतर उपस्थित शेतकऱ्यांकडून ‘देवेंद्र फडणवीस आगे बढो’ अशा घोषणा देण्यात आल्याचे सांगण्यात आले.
दरम्यान, २०२६ मध्ये महाराष्ट्र सरकारने शेतकऱ्यांसाठी स्वतंत्र कर्जमाफी योजना मंजूर केली असून, त्याअंतर्गत पात्र शेतकऱ्यांच्या ₹२ लाखांपर्यंतच्या पीककर्जाला कर्जमाफी देण्याची तरतूद आहे.
#WATCH वाशिम: महाराष्ट्र के मुख्यमंत्री देवेंद्र फडणवीस ने सूखा प्रभावित फसलों का जायजा लेने और किसानों से बातचीत करने के लिए करंजा तहसील के मसला गांव का दौरा किया। pic.twitter.com/6vAkxPkCNi
— ANI_HindiNews (@AHindinews) September 24, 2026
लातूरमध्ये दुष्काळाची तीव्रता अधोरेखित
फडणवीस यांनी यापूर्वी लातूर, धाराशिव आणि सोलापूरमधील दुष्काळसदृश परिस्थितीची पाहणी केली. लातूरमधील शेतकऱ्यांशी बांधावर जाऊन त्यांनी संवाद साधला आणि नुकसानाची माहिती घेतली. लातूर आणि धाराशिवमध्ये यंदा पावसाचे प्रमाण सुमारे ५० टक्क्यांपर्यंत राहिल्याचे त्यांनी सांगितले होते. या परिस्थितीत शेतकऱ्यांना मदत करण्यासाठी सरकारकडून पाणी, चारा आणि आर्थिक मदतीसह विविध उपाययोजनांवर भर दिला जात असल्याचे त्यांनी स्पष्ट केले.
दुष्काळाच्या संकटात शेतकऱ्यांना असा धीर देणारा नेता पाहिजे.
— शुभम कराड (@shubham_9909) September 24, 2026
कर्जमाफी जो पर्यंत प्रत्येक शेतकऱ्याला मिळत नाही तोपर्यंत चालू राहणार –देवाभाऊ.
तत्काळ देवाभाऊंनी बाहेर येऊन त्यांच्या मागण्या ऐकून घेतल्या आणि शेतकऱ्यांना वाऱ्यावर सोडले जाणार नाही हा विश्वास त्यांना दिला.… https://t.co/ulGaWD5sbQ pic.twitter.com/1sE5xLuMH9
सध्या राज्यातील अनेक भागांत पावसाच्या तुटवड्यामुळे शेतीवर परिणाम झाला असून दुष्काळ जाहीर करण्याची मागणीही होत आहे. शासनाकडून पंचनामे आणि परिस्थितीचा आढावा घेण्याची प्रक्रिया सुरू आहे.
