मानोरा (Manora Accident) : मानोरा–कारंजा मार्गावरील कुपटा घाटात २४ एप्रिल रोजी सकाळच्या सुमारास एक अपघात घडला. वळणदार रस्त्यावर नियंत्रण सुटल्याने कार थेट खाईत कोसळली. सुदैवाने या अपघातात कोणतीही जीवितहानी झाली नाही.
माहितीनुसार, काही दिवसांपूर्वी याच ठिकाणी रेतीने भरलेला ट्रक पलटी झाल्याने रस्त्यालगतचे संरक्षक कटडे तुटले होते. मात्र संबंधित विभागाने अद्याप दुरुस्ती न केल्यामुळे हा धोका कायम होता. याच पार्श्वभूमीवर शुक्रवारी कारचालकाचे वाहन थेट दरीत गेले.
या अपघातात कोणतीही जीवितहानी झाली नसली तरी कारचे मोठ्या प्रमाणात नुकसान झाले आहे. “देव तारी त्याला कोण मारी” या म्हणीचा प्रत्यय या घटनेतून आला असून, तुटलेल्या कटड्यांची तातडीने दुरुस्ती करण्याची मागणी स्थानिकांकडून करण्यात येत आहे.
