कळमनुरी (Kalamnuri Census Survey) : नगरपरिषद प्रशासनाकडून शहरात राबविण्यात येत असलेल्या जनगणना मोहिमेचा प्राथमिक टप्पा यशस्वीरीत्या पूर्ण झाला असून, या टप्प्यात संकलित करण्यात आलेल्या आकडेवारीनुसार कळमनुरी शहरात एकूण ७ हजार ३२६ घरांची नोंद करण्यात आली आहे. तसेच शहराची प्राथमिक लोकसंख्या २८ हजार ८७६ इतकी नोंदविण्यात आली आहे.
मिळालेल्या माहितीनुसार, जनगणना मोहिमेअंतर्गत गट क्रमांक ३८ मधील सर्व क्षेत्रांचे सर्वेक्षण करण्यात आले. नगरपरिषदेने नियुक्त केलेल्या प्रगणक आणि विशेष पथकांनी घराघरांत जाऊन माहिती संकलित केली. यामध्ये कुटुंबातील सदस्यसंख्या, घरांचे प्रकार तसेच विविध मूलभूत आणि नागरी सुविधांबाबतची माहिती नोंदविण्यात आली.
जनगणना मोहिमेचा हा टप्पा यशस्वी करण्यासाठी नगरपरिषदेचे मुख्याधिकारी रविराज दरक यांच्या मार्गदर्शनाखाली अधिकारी व कर्मचाऱ्यांनी नियोजनबद्ध पद्धतीने काम केले. नागरिकांनीही आवश्यक माहिती उपलब्ध करून देत सर्वेक्षणाला उत्स्फूर्त प्रतिसाद दिल्याने हे काम नियोजित कालावधीत पूर्ण होऊ शकले.
नगरपरिषद प्रशासनाच्या मते, या प्राथमिक जनगणनेमुळे शहराच्या लोकसंख्यावाढीचे आणि विस्ताराचे वास्तव चित्र समोर आले आहे. संकलित आकडेवारीचा उपयोग आगामी विकासकामांचे नियोजन, पाणीपुरवठा व्यवस्था, रस्ते विकास, स्वच्छता सुविधा आणि इतर नागरी सेवा अधिक प्रभावीपणे राबविण्यासाठी होणार आहे.
तसेच, वाढत्या लोकसंख्येनुसार शासनाकडून मिळणाऱ्या निधीचे नियोजन आणि योग्य विनियोजन करण्यासाठीही ही माहिती उपयुक्त ठरणार आहे. भविष्यातील प्रभागरचना, प्रशासकीय सुविधा आणि शहर विकास आराखडा तयार करतानाही या आकडेवारीचा महत्त्वपूर्ण आधार मिळणार आहे.
प्राथमिक टप्पा पूर्ण झाल्यानंतर आता नगरपरिषद प्रशासनाने डेटा पडताळणी आणि पुढील तांत्रिक प्रक्रियेला सुरुवात केली असून, जनगणनेच्या पुढील टप्प्यातील कामकाजही लवकरच हाती घेण्यात येणार असल्याची माहिती प्रशासनाकडून देण्यात आली.
