आमदरीच्या तरुणाने एसएसआर पदावर मिळवले यश; आर्मीच्या वैद्यकीय चाचणीत अपात्र ठरल्यानंतर पुन्हा तयारी करत नौदलाची परीक्षा केली उत्तीर्ण
मानोरा : बालपणापासून मनात असलेले देशसेवेचे स्वप्न पूर्ण करण्यासाठी सातत्याने मेहनत, शिस्त आणि इच्छाशक्तीच्या जोरावर तालुक्यातील आमदरी येथील क्रिशनव चव्हाण याने भारतीय नौदलात यश मिळवले आहे. त्याची भारतीय नौदलात एसएसआर (सीनियर सेकंडरी रिक्रुट) पदासाठी निवड झाली असून, आगामी काळात प्रशिक्षण पूर्ण करून तो देशसेवेत दाखल होणार आहे.
क्रिशनव चव्हाण याचे प्राथमिक व माध्यमिक शिक्षण भंडारा येथील संत शिवराम विद्यालय या मराठी माध्यमाच्या शाळेत झाले. लहानपणापासूनच त्याला देशसेवेची ओढ होती. हे स्वप्न साकार करण्यासाठी आवश्यक असलेल्या तयारीबाबत त्याने शाळेतील शिक्षकांकडून मार्गदर्शन घेतले.
यानंतर आपल्या ध्येयाच्या दिशेने वाटचाल करण्यासाठी त्याने पुणे येथील नामांकित ‘गरुड झेप’ अकॅडमीमध्ये प्रवेश घेतला. तेथे शिस्त, नियमित कसरत, कठोर परिश्रम आणि आत्मविश्वासाच्या बळावर त्याने सैन्य भरतीसाठी तयारी सुरू ठेवली.
दरम्यान, बालपणी पाहिलेले आर्मीमध्ये जाण्याचे स्वप्न प्रत्यक्षात साकार झाले होते. क्रिशनवची भारतीय आर्मीमध्ये पहिल्यांदा निवड झाली; मात्र वैद्यकीय चाचणीत तो अपात्र ठरला. या अपयशानंतरही त्याने हार न मानता पुन्हा तयारी सुरू केली.
त्यानंतर त्याने भारतीय नौदलाची परीक्षा दिली. या परीक्षेत त्याने यश संपादन केले आणि आता त्याची भारतीय नौदलाच्या एसएसआर पदावर निवड झाली आहे. आगामी काही दिवसांत नौदलात दाखल होऊन प्रशिक्षण पूर्ण केल्यानंतर तो देशसेवेत रुजू होणार आहे.
क्रिशनवचे वडील विवेक चव्हाण हे जिल्हा परिषदेत आरोग्य विभागात कार्यरत आहेत, तर आई गृहिणी आहे. मुलाची भारतीय नौदलात निवड झाल्याने चव्हाण कुटुंबीय आनंदित झाले असून, त्याच्या यशाबद्दल परिसरातून अभिनंदनाचा वर्षाव होत आहे.
