परभणी (House Burglary) : परभणीतील गंगाखेड शहरातील यज्ञभुमी परिसरात अज्ञात चोरट्यांनी घराच्या मुख्य प्रवेश द्वाराचे कुलूप तोडून घरातील साडे पाच तोळे वजनाचे सोन्याचे दागिने लंपास केल्याची घटना रविवार ३१ मे रोजी सकाळी उघडकीस आल्याने खळबळ उडाली आहे. याप्रकरणी गंगाखेड पोलीस ठाण्यात अज्ञात चोरट्याविरुद्ध गुन्हा दाखल करण्यात आला आहे.
याबाबत समजलेली अधिक माहिती अशी की खा. छत्रपती शाहू महाराज यांचे पीए सतिश बाबा चांडे यांच्या पत्नी नंदा सतिश चांडे या गंगाखेड शहरातील यज्ञभुमी परिसरात सायस भेंडेकर यांच्या घरी राहतात. त्या घराला कुलूप लावून मुलांसह माहेरी अकोली ता. गंगाखेड येथे गेल्या असता रविवार ३१ मे रोजी सकाळी ६ वाजता घरमालक सायस भेंडेकर यांनी फोन करून घराचे कुलूप तुटलेले दिसत आहे असे सांगितले.
यानंतर नंदा सतिश चांडे यांनी घरी येऊन पाहणी केली असता अज्ञात चोरट्यांनी घराचे कुलूप तोडून आत प्रवेश करत बॅगमध्ये ठेवलेले चार तोळे वजनाच्या सोन्याच्या ४ बांगड्या व दीड तोळे वजनाचे सोन्याचे शॉट गंठण असा एकूण २ लाख ७५ हजार रुपये किंमतीचा ऐवज व महत्वाची कागदपत्रे लंपास केल्याचे निदर्शनास आले. याबाबत त्यांनी दिलेल्या फिर्यादीनुसार गंगाखेड पोलीस ठाण्यात गुन्हा दाखल करण्यात आला आहे.
गेल्या आठ दिवसांच्या कालावधीत या परिसरात पाच जणांची घरे फोडण्यात आल्याच्या घटनांमुळे नागरिकांमध्ये भीतीचे वातावरण निर्माण झाले आहे. शनिवार ३० मे रोजी सायंकाळी ७ वाजेपासून ते रविवार ३१ मे रोजी सकाळी ६ वाजेदरम्यान ही घरफोडी झाल्याचे समोर आले आहे.
घटनेची माहिती मिळताच उपविभागीय पोलीस अधिकारी राजेंद्र शिरतोडे, पोलीस निरीक्षक श्रीकांत डोंगरे, सहाय्यक पोलीस निरीक्षक शिवाजी सिंगणवाड, राम गित्ते, पोलीस शिपाई पवन राऊत आदींनी घटनास्थळी भेट देऊन पाहणी केली आहे.
