हिंगोली (Automated vehicle inspection) : हिंगोलीकरांसाठी लवकरच स्वयंचलित वाहन तपासणी केंद्र सुरू होणार आहे. उप प्रादेशिक परिवहन अधिकारी सतीश जाधव यांनी आज आरटीओ कार्यालयालगत उभारण्यात आलेल्या केंद्राची पाहणी केली.
या केंद्रात वाहनांच्या फिटनेसची तपासणी संपूर्णपणे संगणकीय प्रणाली व सेन्सरद्वारे केली जाणार आहे. ब्रेक, हेडलाईट, साइड स्लिप, सस्पेंशन, प्रदूषण पातळी यासह सुमारे 18 प्रकारच्या तांत्रिक चाचण्या कोणत्याही मानवी हस्तक्षेपाशिवाय होणार आहेत. चाचणीचा अहवाल थेट संगणकावर तयार होईल व पात्र वाहनांना तात्काळ फिटनेस प्रमाणपत्र मिळेल. सध्या वाहनधारकांना फिटनेससाठी मॅन्युअल तपासणीवर अवलंबून राहावे लागते. नवीन केंद्रामुळे (Automated vehicle inspection) ही प्रक्रिया पारदर्शक व वेगवान होणार असून एका वाहनाची तपासणी 15 ते 20 मिनिटांत पूर्ण होईल.
केंद्र शासनाच्या नियमानुसार 15 वर्षांवरील व्यावसायिक व 20 वर्षांवरील खासगी वाहनांची फिटनेस चाचणी आता फक्त स्वयंचलित केंद्रातच होणार आहे. हिंगोलीतील केंद्राचे बांधकाम व मशिनरी बसवण्याचे काम पूर्ण झाले असून अंतिम चाचण्या सुरू आहेत. येत्या काही दिवसांत हे केंद्र कार्यान्वित होईल, अशी माहिती उप प्रादेशिक परिवहन अधिकारी सतीश जाधव यांनी दिली.
