वसमत, औंढा नागनाथसह परिसरात हादरे; नागरिक घर-दुकानाबाहेर धावले, जीवितहानीचे वृत्त नाही
हिंगोली : मराठवाड्यातील हिंगोली जिल्ह्यात शनिवारी (11 जुलै 2026) पुन्हा एकदा भूकंपाचा धक्का जाणवला. सकाळी 11 वाजून 26 मिनिटांनी झालेल्या या भूकंपाची तीव्रता रिश्टर स्केलवर 3.5 इतकी नोंदवण्यात आली. भूकंपाचा केंद्रबिंदू जमिनीखाली सुमारे 5 किलोमीटर खोलीवर होता. अचानक जमीन हादरल्याने नागरिकांमध्ये भीतीचे वातावरण निर्माण झाले आणि अनेक जण खबरदारी म्हणून घरांमधून व दुकानांमधून बाहेर पडले.
प्राथमिक माहितीनुसार, हिंगोली शहरासह वसमत आणि औंढा नागनाथ परिसरात भूकंपाचे धक्के जाणवले. काही ठिकाणी घरांवरील पत्रे आणि घरातील भांडी हलल्याचा आवाज नागरिकांना जाणवला. या भूकंपामुळे कोणतीही जीवितहानी किंवा मोठ्या वित्तहानीचे वृत्त समोर आलेले नाही.
गेल्या काही दिवसांतील या भागातील हा दुसरा भूकंप आहे. यापूर्वी गुरुवारी पहाटे हिंगोली, परभणी आणि नांदेड या तीन जिल्ह्यांमध्ये एकापाठोपाठ चार भूकंपाचे धक्के जाणवले होते. पहाटे 1 वाजून 37 मिनिटांपासून 3 वाजून 23 मिनिटांदरम्यान झालेल्या या भूकंपांची तीव्रता 3.6 ते 4.6 रिश्टर स्केलदरम्यान नोंदवण्यात आली होती. त्यांचा केंद्रबिंदू हिंगोली जिल्ह्यातील वसमत तालुक्यातील शिरली गावाजवळ होता.
वारंवार होणाऱ्या भूगर्भीय हालचालींमुळे हिंगोली आणि वसमत परिसरातील नागरिकांमध्ये चिंता वाढली आहे. उपलब्ध माहितीनुसार, वर्षभरात हिंगोली जिल्ह्यात भूकंपाचे सात धक्के जाणवले आहेत. शनिवारच्या हादऱ्यानंतरही अनेक नागरिक सुरक्षेच्या दृष्टीने तातडीने मोकळ्या जागेत आले.
सततच्या भूकंपाच्या धक्क्यांमुळे हिंगोली, परभणी आणि नांदेड जिल्ह्यांतील अनेक घरांना तडे गेल्याची माहिती आहे. काही भागांतील घरांच्या भिंतींना भेगा पडल्याचे फोटो आणि व्हिडिओ सोशल मीडियावर समोर आले आहेत. मात्र, आतापर्यंत कोणतीही जीवितहानी झाल्याचे वृत्त नाही.
भूकंपानंतर जिल्ह्यातील अधिकाऱ्यांनी परिस्थितीचा तातडीने आढावा घेतला. महसूल विभाग, पोलीस आणि आपत्ती व्यवस्थापन पथके सतर्क ठेवण्यात आली असून संबंधित विभाग परिस्थितीवर लक्ष ठेवून आहेत. कोणत्याही आपत्कालीन परिस्थितीला सामोरे जाण्यासाठी आवश्यक तयारी करण्यात आली आहे.
भूकंपशास्त्रज्ञ या परिसरातील भूगर्भीय हालचालींचे निरीक्षण करत आहेत. प्रशासनाने नागरिकांना अफवांवर विश्वास न ठेवण्याचे तसेच आपत्कालीन परिस्थितीत स्थानिक प्रशासनाकडून दिल्या जाणाऱ्या सूचनांचे पालन करण्याचे आवाहन केले आहे.
भूकंप का होतात?
भूकंप प्रामुख्याने पृथ्वीच्या अंतर्गत भागातील टेक्टोनिक प्लेट्सच्या हालचालींमुळे होतात. या भूगर्भीय पट्ट्या एकमेकांवर आदळणे, एकमेकांना घासणे किंवा परस्परांपासून दूर जाणे यामुळे पृथ्वीच्या पृष्ठभागावर कंपने निर्माण होऊ शकतात. याशिवाय ज्वालामुखीचा उद्रेक तसेच मोठी धरणे, खाणकाम आणि अणू चाचण्यांसारख्या मानवनिर्मित कारणांमुळेही काही वेळा भूकंपीय हालचाली होऊ शकतात.
