Ganapati Visarjan Rasta Roko: डिगोळ (ता. शिरूर अनंतपाळ) गणपती विसर्जनाच्या वेळी पोलिसांच्या सूचनांचे पालन न करता रस्ता रोको केल्याप्रकरणी १४ जणांसह इतरांविरुद्ध शिरूर अनंतपाळ पोलीस ठाण्यात गुन्हा दाखल
निलंगा (Ganapati Visarjan Rasta Roko) : डिगोळ (ता. शिरूर अनंतपाळ) येथे गणपती विसर्जनाच्या वेळी पोलिसांच्या सूचनांचे पालन न करता रस्ता रोको केल्याप्रकरणी १४ जणांसह इतरांविरुद्ध शिरूर अनंतपाळ पोलीस ठाण्यात गुन्हा दाखल करण्यात आला आहे. पोलिसांनी दिलेल्या माहितीनुसार, २२ सप्टेंबर रोजी रात्री सुमारे १०.३५ ते ११.५० वाजण्याच्या दरम्यान लातूर-उदगीर राष्ट्रीय महामार्ग क्रमांक ६३ वरील डिगोळ येथे ही घटना घडली. शंभू महादेव गणेश मंडळाच्या पदाधिकाऱ्यांसह संबंधित व्यक्तींनी निर्धारित वेळेत गणपती विसर्जन न करता महामार्गावर एकत्र येऊन रस्ता रोको केल्याचा आरोप आहे.
यावेळी पोलिसांनी दिलेल्या सूचनांचे पालन करण्यास नकार देऊन पोलिस कर्मचारी, होमगार्ड व महिला होमगार्ड यांच्यासोबत वाद घातल्याचे, धक्काबुक्की तसेच शिवीगाळ केल्याचे फिर्यादीत नमूद करण्यात आले आहे. तसेच शासकीय कर्तव्य बजावत असताना पोलिसांच्या कामात अडथळा निर्माण करून जिवे मारण्याची धमकी दिल्याचा आरोपही करण्यात आला आहे. या प्रकरणी पोलीस शिपाई विनय वशिष्ठ उबाळे यांच्या फिर्यादीवरून भारतीय न्याय संहितेतील विविध कलमांसह महाराष्ट्र पोलीस कायद्यातील संबंधित कलमांनुसार गुन्हा क्रमांक २९२/२०२६ दाखल करण्यात आला आहे.
गुन्ह्यात माधव भाउसाहेब बिरादार, रामेश्वर विनोद डिगोळे, मंगेश मारोती दासरे, सुदर्शन दिनकर डिगोळे, गोविंद मधुकर दासरे, संदीप मारोती टाकळगावे, किरण रविंद्र बिरादार, नवाज बाबुराव मुजेवार, शुभम नानासाहेब बिरादार, सुधाकर शिंगरुपे, बाळू महादू लोंढे, सतीश राजाराम कलमे, सचिन माधव वडजे, अमोल ज्ञानोबा शेळके यांच्यासह इतर व्यक्तींचा समावेश आहे.
गुन्हा दाखल झाल्यानंतर पुढील तपास पोलीस उपनिरीक्षक रायबोळे यांच्याकडे सोपविण्यात आला आहे.