केसरी वनरक्षक म्हणून होत्या कार्यरत; माडखोल धवडकी येथील घटनेची पोलिसांकडून चौकशी सुरू
सिंधुदुर्ग जिल्ह्यातील आंबोली परिसरात २२ वर्षीय महिला वनकर्मचाऱ्याच्या मृत्यूची घटना समोर आली आहे. आंबोली वन परिमंडळातील केसरी येथे वनरक्षक म्हणून कार्यरत असलेल्या आश्लेषा सागर मांगले यांचा माडखोल धवडकी येथील भाड्याच्या घरात मृत्यू झाला. आश्लेषा मांगले या मूळच्या आजरा, कोल्हापूर येथील रहिवासी होत्या.
रविवारी सुट्टी असल्याने आश्लेषा दिवसभर आपल्या खोलीतच होत्या. मात्र, बराच वेळ उलटूनही त्या घराबाहेर न आल्याने घरमालक पूजा गोवेकर यांना संशय आला. त्यांनी दरवाजा ठोठावून प्रतिसाद मिळवण्याचा प्रयत्न केला. आतून कोणताही प्रतिसाद न मिळाल्याने दरवाजा उघडून पाहिल्यानंतर आश्लेषा मृतावस्थेत आढळल्या.
ही घटना रविवारी दुपारी सुमारे अडीच वाजण्याच्या सुमारास घडल्याचे सांगण्यात येत आहे. आश्लेषा मांगले यांच्या मृत्यूमागील नेमके कारण अद्याप स्पष्ट झालेले नाही.
मिळालेल्या माहितीनुसार, आश्लेषा सागर मांगले या सुमारे तीन वर्षांपूर्वी सिंधुदुर्ग वन विभागाच्या सेवेत रुजू झाल्या होत्या. त्यांच्याकडे आंबोली वन परिक्षेत्रातील केसरी वनरक्षक पदाची जबाबदारी होती. माडखोल धवडकी येथे त्या पूजा गोवेकर यांच्या घरात भाड्याने राहत होत्या.
घटनेची माहिती मिळताच सहाय्यक पोलीस निरीक्षक हर्षद हिंगे, पोलीस उपनिरीक्षक माधुरी मुळीक आणि पोलीस महेश जाधव यांनी घटनास्थळी पोहोचून पंचनामा केला. वनविभागाच्या देवसू येथील अधिकाऱ्यांनाही घटनास्थळी बोलावण्यात आले.
याप्रकरणी घरमालक पूजा गोवेकर यांनी पोलिसांना माहिती दिल्यानंतर आकस्मिक मृत्यूची नोंद करण्यात आली आहे. या घटनेचा पुढील तपास पोलीस उपनिरीक्षक माधुरी मुळीक करत आहेत.
