शॉर्ट सर्किटमुळे आग लागल्याचा प्राथमिक अंदाज – अग्निशमन दलाच्या दोन गाड्यांनी आग आटोक्यात, व्यापाऱ्यांचे लाखोंचे नुकसान
देऊळगाव राजा (Fire Accident) : बुलढाणा जिल्ह्यातील देऊळगाव राजा शहरात आज दुपारी भीषण आग लागल्याची घटना घडली. शहराच्या मध्यवर्ती भागातील मेन रोडवरील सलग पाच दुकानांना अचानक आग लागल्याने परिसरात एकच खळबळ उडाली.
आग इतकी भीषण होती की काही क्षणातच आगीचे मोठमोठे लोळ उसळले आणि मुख्य मार्गावर भीतीचे वातावरण निर्माण झाले. या आगीत किराणा दुकान, रेडिमेड कपड्यांचे दुकान, आईस्क्रीम पार्लर तसेच इतर दोन दुकाने पूर्णपणे जळून खाक झाली.
प्राथमिक माहितीनुसार शॉर्ट सर्किटमुळे आग लागल्याचा अंदाज व्यक्त करण्यात येत आहे.
घटनेची माहिती मिळताच देऊळगाव राजा नगर परिषद अग्निशमन विभागच्या दोन गाड्या तातडीने घटनास्थळी दाखल झाल्या. अग्निशमन दलाच्या जवानांनी शर्थीचे प्रयत्न करत काही वेळातच आग आटोक्यात आणली.
सुदैवाने या घटनेत कोणतीही जीवितहानी झाली नाही. मात्र, व्यापाऱ्यांचे मोठ्या प्रमाणात आर्थिक नुकसान झाले आहे.
घटनेनंतर परिसरात नागरिकांची मोठी गर्दी झाली होती आणि काही काळ वाहतूकही विस्कळीत झाली.
