२२ सप्टेंबरला अधीक्षक अभियंत्यांना जाब विचारला जाणार
हिंगोली (Electricity Consumers' Association) : सणासुदीच्या दिवसांमध्ये वारंवार खंडित होणारा वीज पुरवठा, ग्राहकांच्या संमतीशिवाय सक्तीने बसवण्यात येणारे स्मार्ट मीटर आणि ग्रामीण भागातील कोलमडलेली वीज व्यवस्था यामुळे त्रस्त झालेल्या वीज ग्राहक संघटनेने आता थेट महावितरणच्या वरिष्ठ अधिकार्‍यांना जाब विचारण्याचा निर्णय घेतला आहे. या संदर्भात मंगळवार २२ सप्टेंबर रोजी दुपारी ठीक तीन वाजता संघटनेच्या वतीने अधीक्षक अभियंता यांची भेट घेण्यात येणार आहे. ही भेट मोर्चाच्या स्वरूपाची नसून, ग्राहकांच्या प्रलंबित तक्रारींवर चर्चा करण्यासाठी आयोजित केलेली बैठक आहे.
मध्यंतरीच्या काळात अनेक ग्राहकांनी ग्रुपवर आणि संघटनेच्या सदस्यांकडे वीज पुरवठा खंडित होणे, ग्रामीण भागातील वीज यंत्रणेची दुरवस्था आणि लाईन कर्मचार्‍यांच्या कामकाजातील दिरंगाईबाबत तक्रारी मांडल्या होत्या. मात्र अद्यापही त्यावर कोणताही ठोस तोडगा निघाला नसल्याने ही बैठक आयोजित करण्यात आली आहे. विशेषतः सणाचे दिवस असतानाही तासनतास वीज पुरवठा खंडित होत असल्याने नागरिकांमध्ये तीव्र नाराजी आहे.
त्याचबरोबर ग्राहकांना कोणतीही पूर्वकल्पना न देता स्मार्ट मीटर बसवण्याचा प्रकार सुरू असल्याचा आरोपही संघटनेने केला आहे.ज्या ग्राहकांच्या तक्रारींचे अद्याप समाधान झालेले नाही, अशा सर्व ग्राहकांनी आपली वीज बिले आणि लेखी तक्रारीसह या बैठकीस वेळेवर उपस्थित राहावे, असे आवाहन वीज ग्राहक संघटनेच्या वतीने करण्यात आले आहे.
