डीवायएसपी समीरसिंह साळवे यांची माहिती; कारमधून भूल देण्याच्या औषधाच्या रिकाम्या बाटल्या आणि सिरिंज जप्त, मोबाईल डेटाची तपासणी सुरू
लातूर शहरातील एम.जे. हॉस्पिटलचे प्रसिद्ध हृदयरोगतज्ज्ञ डॉ. मेहुल ईश्वर राठोड यांच्या संशयास्पद मृत्यू प्रकरणात पोलिसांनी प्राथमिक तपासाबाबत महत्त्वाची माहिती दिली आहे. या हायप्रोफाईल प्रकरणात लातूर शहराचे पोलीस उपअधीक्षक समीरसिंह साळवे यांनी सांगितले की, उपलब्ध पुराव्यांच्या आधारे प्रथमदर्शनी हा घातपात नसून आत्महत्येचाच प्रकार असल्याचे दिसून येत आहे. मात्र, अंतिम निष्कर्ष सविस्तर तपासानंतरच स्पष्ट होणार असल्याचे त्यांनी नमूद केले.
या प्रकरणाबाबत माहिती देताना डीवायएसपी समीरसिंह साळवे यांनी सांगितले की, प्राथमिक तपासात डॉ. मेहुल राठोड यांनी स्वतःला भूल देण्यासाठी वापरण्यात येणारे इंजेक्शन घेतल्याचे समोर आले आहे. तथापि, सर्व तांत्रिक आणि वैद्यकीय तपास पूर्ण झाल्यानंतरच मृत्यूमागील नेमके कारण स्पष्ट होईल.
पोलिसांच्या माहितीनुसार, घटनास्थळावर किंवा कारमध्ये कोणतीही सुसाईड नोट अथवा चिठ्ठी आढळून आलेली नाही. त्यामुळे तपासाचा भाग म्हणून डॉ. राठोड यांचा मोबाईल ताब्यात घेण्यात आला असून, त्यातील डेटा तपासला जात आहे. या तपासातून मिळणाऱ्या माहितीच्या आधारे पुढील निष्कर्ष काढले जाणार आहेत.
या प्रकरणी लातूर एमआयटी पोलीस ठाण्यात अकस्मात मृत्यूची नोंद करण्यात आली असून, गुरुवारी सकाळी मृतदेहाचे शवविच्छेदन करण्यात आले आहे.
प्राथमिक माहितीनुसार, बुधवारी सकाळी डॉ. मेहुल राठोड यांच्या पत्नी आणि प्रसिद्ध कॅन्सरतज्ज्ञ डॉ. प्रियांका या नेहमीप्रमाणे हॉस्पिटलमध्ये गेल्या. त्यानंतर डॉ. मेहुल यांनी आपल्या इनोव्हा कारने घर सोडले. सायंकाळी चार वाजेपर्यंत ते घरी न परतल्याने आणि फोनवर संपर्क न झाल्याने डॉ. प्रियांका यांनी त्यांच्या मोबाईलचे लोकेशन तपासले. त्यावेळी लोकेशन घरापासून सुमारे आठ किलोमीटर अंतरावरील अंबाजोगाई रोडवरील एमआयटी कॉलेज परिसरात असल्याचे दिसून आले.
लोकेशनच्या आधारे घटनास्थळी पोहोचल्यानंतर डॉ. मेहुल हे कारमध्ये बेशुद्धावस्थेत आढळले. त्यांना तातडीने फुलाबाई बनसोडे रुग्णालयात उपचारासाठी दाखल करण्यात आले. मात्र, उपचारादरम्यान त्यांचा मृत्यू झाला.
पोलिसांनी कारची तपासणी केली असता चालकाच्या बाजूच्या सीटवर भूल देण्याच्या औषधाच्या रिकाम्या बाटल्या आणि सिरिंज आढळून आल्या. त्यामुळे औषधाचा ओव्हरडोस घेतल्याचा संशय अधिक बळावला आहे. घटनास्थळाचा पंचनामा करण्यात आला असून, वरिष्ठ अधिकाऱ्यांच्या मार्गदर्शनाखाली पोलीस या प्रकरणाचा सर्व बाजूंनी सखोल तपास करत आहेत.
टीप: ही माहिती पोलिसांच्या प्राथमिक तपासावर आधारित आहे. मृत्यूचे नेमके कारण अधिकृत तपास आणि वैद्यकीय अहवालानंतरच स्पष्ट होईल.
