जिल्हाधिकार्‍यांच्या नावाने पुन्हा दुसर्‍यांदा बनावट फेसबुक अकाऊंट

नागरीकांना सतर्क राहण्याचे आवाहन

हिंगोली (Collector Rahul Gupta) : जिल्हाधिकारी राहुल गुप्ता यांच्या नावाने आणि फोटोचा वापर करून काही अज्ञातांनी सोशल मीडियावर बनावट (फेक) फेसबुक प्रोफाइल तयार केल्याचा प्रकार समोर आला आहे. या बनावट अकाउंटवरून नागरिकांना मेसेज पाठवून दिशाभूल करण्याचा प्रयत्न केला जात असून, नागरिकांनी अशा कोणत्याही आवाहनाला किंवा मेसेजला बळी पडू नये, असे आवाहन जिल्हा प्रशासनाकडून करण्यात आले आहे. 

मिळालेल्या माहितीनुसार, सायबर गुन्हेगारांनी जिल्हाधिकारी राहुल गुप्ता (Collector Rahul Gupta) यांच्या नावाचे हुबेहूब फेसबूक अकाउंट तयार केले आहे. या अकाउंटवर जिल्हाधिकार्‍यांचे अधिकृत फोटो वापरून ते खरे असल्याचे भासवण्याचा प्रयत्न केला जात आहे. अशा बनावट खात्यांमधून नागरिकांना अथवा शासकीय कर्मचार्‍यांना वैयक्तिक मेसेज पाठवणे, आर्थिक मागणी करणे किंवा संशयास्पद लिंक्स पाठवण्याचे प्रकार घडू शकतात. 

हा प्रकार निदर्शनास येताच  जिल्हाधिकारी राहुल गुप्ता (Collector Rahul Gupta) यांनी तातडीने याची दखल घेतली आहे. संबंधित बनावट फेसबुक प्रोफाइलबाबत सायबर  पोलिसांना माहिती देण्यात आली आहे.  जिल्हाधिकार्‍यांच्या नावाने आलेल्या कोणत्याही संशयास्पद मेसेजला उत्तर देऊ नका. जर कोणाकडून पैशांची मागणी किंवा वैयक्तिक माहिती विचारली जात असेल, तर त्वरित ब्लॉक करा. अशा प्रकारचा मेसेज आल्यास स्थानिक सायबर पोलीस स्टेशनशी संपर्क साधावा. सोशल मीडियाचा वापर करताना नागरिकांनी खबरदारी बाळगावी आणि अफवा किंवा बनावट अकाउंट्सला बळी पडू नये, असे प्रशासनाकडून स्पष्ट करण्यात आले आहे. 

दरम्यान भाजपचे युवानेते गोल्डी प्रशांत सोनी यांनाही यापूर्वी जिल्हाधिकार्‍यांच्या नावाने अशाच बनावट आयडीव्दारे अशाच पध्दतीचा संदेश आला होता. त्यावेळी त्यांनी ही बाब जिल्हाधिकार्‍यांच्या निदर्शनास आणुन दिल्यानंतर सदर प्रकरणात गुन्हा दाखल झाला होता.