वरोली- सेवादासनगर परिसरात चक्रीवादळ; अनेकांची घरावरील टिनपत्रे उडाली! 

मानोरा (Varoli cyclone damage) : तालुक्यातील वरोली - सेवादासनगर परिसरात दि. १३ मे रोजी दुपारच्या सुमारास सुसाट्याच्या वाऱ्यासह चक्रीवादळाने तांडव माजविल्याने अनेकांच्या घरावरील टिनपत्रे उडून अतोनात नुकसान झाले आहे. 
 
सविस्तर असे की, बुधवारी सकाळपासून वरोली - सेवादासनगर परिसरात आभाळ दाटून आले होते. दुपारी २.३५ वाजताच्या सुमारास अचानकच अवकाळी पावसासह वादळी वाऱ्याने सुरुवात केली. सुसाट्याचा चक्रीवादळाच्या वाऱ्याने अनेक नागरिकांच्या घरावरील टिनपत्रे उडून अतोनात नुकसान झाले आहे. तर या (Varoli cyclone damage) भागातील फळबाग व भाजीपाला पिकांचेही मोठ्या प्रमाणावर नुकसान होऊन अनेकांच्या घरांची पडझड झाली आहे. या चक्रीवादळाच्या तांडवात काही वेळातच होत्याचे नव्हते झाल्याने प्रशासनाने पाहणी व पंचनामे करून शासनाची आर्थिक मदत मिळवून देण्याची मागणी बाधीत नुकसानग्रस्त नागरिकांनी केली आहे.
  
सेवादासनगर येथील अत्यल्प भूधारक शेतकरी मनोहर बाबाराव राठोड यांच्या घरावरील टिनपत्रे उडून घरांचीही अतोनात नुकसान झाले आहे. प्रशासनाने पंचनामा करून नुकसान भरपाई देण्याची मागणी केली आहे.