कार्यालयातील स्वच्छतागृहात घटना; आरोपीला कठोर शिक्षा देण्याची मागणी, आमदार रोहित पवारांकडून शक्ती कायदा लागू करण्याचे आवाहन
पोलिसांनी दिलेल्या माहितीनुसार, आरोपीचे नाव परवेज असून तो मूळचा झारखंडचा रहिवासी आहे. तो गेल्या सहा महिन्यांपासून ‘मा कॉर्पोरेट सर्व्हिसेस’ या कुरिअर कंपनीत सुरक्षा रक्षक म्हणून कार्यरत होता. संबंधित कंपनीच्या कार्यालयातील स्वच्छतागृहात मुलीवर अत्याचार झाल्याचा आरोप आहे.
घटनेच्या वेळी आरोपी मद्याच्या प्रभावाखाली असल्याचा पोलिसांचा प्राथमिक दावा आहे. एका स्थानिक रहिवाशाने आरोपीला मुलीसोबत पाहिल्यानंतर हा प्रकार निदर्शनास आला. त्यानंतर स्थानिक नागरिक आणि मुलीच्या आईने आरोपीला पकडून पोलीस ठाण्यात नेले आणि पोलिसांच्या ताब्यात दिले. घटनेची माहिती परिसरात पसरताच नागरिकांमध्ये तीव्र संताप व्यक्त झाला. रविवारी शेकडो नागरिक पायधुनी परिसरातील पोलीस ठाण्याबाहेर जमा झाले. आरोपीविरोधात कठोर कारवाई करून त्याला कठोरात कठोर शिक्षा देण्यात यावी, अशी मागणी आंदोलकांनी केली.
आंदोलनादरम्यान काही काळ पोलीस ठाण्याबाहेरील रस्ता रोखण्यात आल्याने वाहतुकीवर परिणाम झाला. त्यानंतर पोलिसांनी परिस्थिती नियंत्रणात आणत वाहतूक पूर्ववत केली. या घटनेची माहिती मिळाल्यानंतर महाराष्ट्र विधानसभेचे अध्यक्ष राहुल नार्वेकर यांनी पोलीस ठाण्याला भेट दिली. यावेळी काही आंदोलकांनी त्यांना घेराव घालत आरोपीवर कठोर कारवाई करण्याच्या मागणीसाठी घोषणाबाजी केली.
राष्ट्रवादी काँग्रेस पार्टी (शरदचंद्र पवार) पक्षाचे आमदार रोहित पवार यांनीही या घटनेवर तीव्र प्रतिक्रिया व्यक्त केली. त्यांनी X वरील पोस्टमध्ये या प्रकाराला संतापजनक आणि अत्यंत गंभीर म्हटले. पुणे जिल्ह्यात चिमुकलीवरील बलात्कार आणि हत्या प्रकरणात नुकतीच 65 वर्षीय व्यक्तीला फाशीची शिक्षा सुनावण्यात आल्याच्या पार्श्वभूमीवर त्यांनी या घटनेचा उल्लेख केला.
नसरापूर घटनेतील आरोपीला फाशीची शिक्षा सुनावल्याची घटना ताजी असतानाही मुंबईत पायधुनी परिसरात एका अवघ्या ७ वर्षाच्या चिमुरडीवर वॉचमनने अत्याचार केल्याची संतापजनक आणि गंभीर घटना घडली. सरसकट सर्वच खटल्यात नसरापूरप्रमाणे तातडीने न्याय मिळत नाही म्हणून आरोपींना कायद्याचा धाक राहिला…
— Rohit Pawar (@RRPSpeaks) July 12, 2026
अशा प्रकरणांमध्ये तातडीने न्याय मिळत नसल्याने कायद्याचा धाक कमी होत असल्याचे रोहित पवार यांनी म्हटले. महिला आणि बालकांविरोधातील गंभीर गुन्ह्यांच्या खटल्यांचा जलदगतीने निकाल लावण्याची व्यवस्था करण्यासोबतच कठोर तरतुदी असलेला शक्ती कायदा तातडीने लागू करण्याची मागणी त्यांनी केली. नुकत्याच संपलेल्या विधिमंडळ अधिवेशनातही आपण ही मागणी उपस्थित केल्याचे पवार यांनी नमूद केले. राज्य सरकारने याबाबत तातडीने पावले उचलावीत, असे आवाहन करत त्यांनी पीडित मुलगी लवकर बरी व्हावी, अशी प्रार्थनाही केली.
