पुणे (Crime Against Children) : पुणे जिल्ह्यातील भोर तालुक्यात एक अत्यंत धक्कादायक आणि संतापजनक घटना उघडकीस आली आहे. तालुक्यातील एका गावात चार वर्षांच्या चिमुकलीवर लैंगिक अत्याचार करून तिची निर्दयी हत्या करण्यात आल्याची माहिती समोर आली आहे. या घटनेने संपूर्ण परिसर हादरला असून नागरिकांमध्ये तीव्र संताप व्यक्त केला जात आहे. संतप्त ग्रामस्थांनी चिमुकलीचा मृतदेह पोलीस ठाण्याबाहेर ठेवत रास्ता रोको आंदोलन सुरू केले आहे. दरम्यान, या अमानुष कृत्य करणाऱ्या आरोपीला पोलिसांनी तात्काळ अटक केली आहे.
प्राथमिक माहितीनुसार, सुमारे 65 वर्षीय आरोपीने घरासमोर खेळत असलेल्या चिमुकलीला फसवून गोठ्यात नेले. तेथे तिच्यावर लैंगिक अत्याचार करून तिची दगडाने ठेचून हत्या केल्याची माहिती समोर आली आहे. इतकेच नव्हे, तर गुन्हा लपवण्याच्या उद्देशाने आरोपीने चिमुकलीचा मृतदेह शेणाच्या ढिगाऱ्याखाली दडवून ठेवला होता. या क्रूर कृत्यामुळे संपूर्ण गावात संतापाची लाट उसळली आहे.
दुपारच्या सुमारास चिमुकली दिसत नसल्याने कुटुंबीयांनी तिचा शोध सुरू केला. गावकऱ्यांनीही शोध मोहिमेत सहभाग घेतला. बराच वेळ शोध घेतल्यानंतर गोठ्यात चिमुकलीचा मृतदेह आढळून आला. या घटनेनंतर परिसरातील सीसीटीव्ही फुटेज तपासण्यात आले असता आरोपी चिमुकलीला गोठ्याकडे घेऊन जाताना स्पष्टपणे दिसून आला. यानंतर हा प्रकार उघडकीस आला आणि पोलिसांनी तात्काळ कारवाई करत आरोपीला अटक केली.
स्थानिकांच्या माहितीनुसार, संबंधित चिमुकली सुट्टीसाठी आपल्या आजीकडे आली होती. या दुर्दैवी घटनेने तिच्या कुटुंबावर दुःखाचा डोंगर कोसळला आहे. गावातील महिलांनी आणि नागरिकांनी आरोपीला कठोरात कठोर शिक्षा देण्याची मागणी केली आहे.
घटनेनंतर परिसरात तणावाचे वातावरण निर्माण झाले असून कायदा व सुव्यवस्था राखण्यासाठी मोठा पोलीस बंदोबस्त तैनात करण्यात आला आहे. ग्रामस्थांनी प्रशासनाविरोधात तीव्र नाराजी व्यक्त करत, अशा घटनांवर आळा घालण्यासाठी कठोर उपाययोजना करण्याची मागणी केली आहे.
दरम्यान, पोलिसांकडून या प्रकरणाचा सखोल तपास सुरू असून आरोपीविरोधात कठोर कायदेशीर कारवाई करण्यात येणार असल्याची माहिती देण्यात आली आहे. या घटनेने पुन्हा एकदा समाजातील सुरक्षिततेबाबत गंभीर प्रश्न निर्माण केले असून लहान मुलांच्या सुरक्षेबाबत अधिक जागरूकता आणि कडक उपाययोजनांची गरज अधोरेखित झाली आहे.
