चाकूर : चाकूर तालुक्यातील महाळंग्रा येथील शेतकरी शिवाजी शिंदे यांचे विजेचा धक्का बसल्याने दुर्दैवी निधन झाले होते. या संकटसमयी शिंदे कुटुंबाला शासनाकडून आर्थिक दिलासा मिळाला आहे. राज्याचे सहकार मंत्री बाबासाहेब पाटील यांच्या विशेष पाठपुराव्यामुळे महावितरणच्या वतीने मंजूर करण्यात आलेला ३ लाख ८० हजार रुपयांचा मदत निधी धनादेशाच्या स्वरूपात त्यांच्या कुटुंबीयांना सुपूर्द करण्यात आला.
शेतकरी शिवाजी शिंदे यांच्या निधनानंतर सहकार मंत्री बाबासाहेब पाटील यांनी त्यांच्या निवासस्थानी भेट देऊन कुटुंबीयांचे सांत्वन केले होते. तसेच शासनाकडून सर्वतोपरी आर्थिक मदत मिळवून देण्याचे आश्वासन दिले होते. त्यानुसार त्यांनी महावितरणच्या वरिष्ठ अधिकाऱ्यांकडे सातत्याने पाठपुरावा केला.
या पाठपुराव्याला यश येत महावितरणकडून ३ लाख ८० हजार रुपयांचा मदत निधी मंजूर करण्यात आला. सहकार मंत्री बाबासाहेब पाटील यांच्या हस्ते हा धनादेश शिंदे यांच्या वारसांना सुपूर्द करण्यात आला.
यावेळी महावितरणचे उपविभागीय अभियंता कुणाल पेन्सलवार, जिल्हा परिषद उपाध्यक्ष दयानंद सुरवसे, समाज कल्याण सभापती उत्तमराव माने यांच्यासह अन्य मान्यवर उपस्थित होते.
