“बीएसएनएल कार्यालय की डम्पिंग ग्राउंड?”, घोटकरांचा सवाल
वीज गेली की नेटवर्क गायब; वर्षभरापासून समस्या कायम
घोट (Ghot BSNL service) : घोट येथील बीएसएनएल सेवा गेल्या तीन दिवसांपासून पूर्णपणे खंडित झाली असून नागरिकांना मोठ्या अडचणींचा सामना करावा लागत आहे. आधीच गेल्या वर्षभरापासून वीजपुरवठा खंडित होताच नेटवर्क बंद पडण्याची समस्या कायम असताना, आता सलग तीन दिवस सेवा ठप्प झाल्याने नागरिकांमध्ये तीव्र नाराजी व्यक्त होत आहे. माहितीनुसार, सुमारे वर्षभरापूर्वी बीएसएनएल टॉवरच्या बॅटऱ्यांची चोरी झाली होती. मात्र, अद्याप नवीन बॅटऱ्या बसविण्यात आलेल्या नाहीत. परिणामी, वीजपुरवठा खंडित होताच संपूर्ण नेटवर्क कोलमडते. याचा थेट परिणाम मोबाईल सेवा, इंटरनेट सुविधा आणि ऑनलाइन व्यवहारांवर होत असून दैनंदिन जीवन विस्कळीत झाले आहे.
विशेषतः विद्यार्थी, शेतकरी आणि व्यापारी वर्ग यांना या समस्येचा मोठा फटका बसत आहे. (Ghot BSNL service) ऑनलाइन शिक्षण, बँकिंग व्यवहार तसेच शासकीय सेवा यामध्ये अडथळे निर्माण होत आहेत. दरम्यान, बीएसएनएल कार्यालयाची स्थितीही अत्यंत दयनीय झाली आहे. अनेक वर्षांपासून येथे स्थायी चौकीदार किंवा ऑपरेटर नसल्याने संपूर्ण कार्यालय बेवारस अवस्थेत आहे. याचाच फायदा घेत अज्ञात चोरट्यांनी टॉवरच्या बॅटऱ्या लंपास केल्या. मात्र, या गंभीर घटनेनंतरही संबंधित विभागाने कोणतीही ठोस कारवाई केलेली नाही.
कार्यालय परिसरात साचलेल्या कचऱ्यामुळे संपूर्ण परिसर डम्पिंग ग्राउंडसारखा दिसत असून स्वच्छतेचा पूर्ण अभाव जाणवतो. यामुळे प्रशासनाच्या दुर्लक्षावर नागरिकांनी संताप व्यक्त केला आहे. घोट (Ghot BSNL service) व परिसरातील नागरिकांनी संबंधित विभागाने तात्काळ दखल घेऊन नवीन बॅटऱ्या बसवाव्यात, सेवा त्वरित पूर्ववत सुरू करावी, कार्यालय परिसराची स्वच्छता करावी तसेच कायमस्वरूपी चौकीदार नेमून सुरक्षाव्यवस्था मजबूत करावी, अशी मागणी जोर धरत आहे.
