वर्क-फ्रॉम-होम आदेशानंतर अचानक ईमेल; जगभरातील कर्मचाऱ्यांना धक्का
Meta Platforms या जगातील आघाडीच्या तंत्रज्ञान कंपनीने मोठ्या प्रमाणावर कर्मचारी कपातीचा निर्णय घेतला असून, सुमारे ८,००० कर्मचाऱ्यांना कामावरून कमी करण्याची प्रक्रिया सुरू केली आहे. कंपनीच्या एकूण कर्मचाऱ्यांपैकी जवळपास १० टक्के कर्मचाऱ्यांवर या निर्णयाचा परिणाम झाला आहे. अमेरिका, ब्रिटन आणि सिंगापूरसह विविध देशांतील कर्मचाऱ्यांना अचानक पाठविण्यात आलेल्या ईमेलमुळे मोठी खळबळ उडाली आहे.
मिळालेल्या माहितीनुसार, सिंगापूरमधून या प्रक्रियेची सुरुवात करण्यात आली. भारतीय वेळेनुसार पहाटे १.३० वाजता कर्मचाऱ्यांना ईमेलद्वारे कामावरून कमी केल्याची माहिती देण्यात आली. यापूर्वी कंपनीने सर्व कर्मचाऱ्यांना ‘वर्क-फ्रॉम-होम’ करण्याचे निर्देश दिले होते. कार्यालयांमध्ये गोंधळ किंवा विरोध टाळण्यासाठी कंपनीने ही रणनीती आखल्याचे सांगितले जात आहे.
AI क्षेत्रावर मोठी गुंतवणूक
कंपनीचे मुख्य लक्ष आता आर्टिफिशियल इंटेलिजन्स (AI) तंत्रज्ञानावर केंद्रित झाले आहे. कर्मचारी कपातीपूर्वी कंपनीत सुमारे ७८ हजार कर्मचारी कार्यरत होते. त्यापैकी ७,००० कर्मचाऱ्यांना नव्या AI विभागात स्थानांतरित करण्यात येणार असल्याची माहिती कंपनीच्या अधिकाऱ्यांनी दिली आहे.
याशिवाय, व्यवस्थापनातील स्तर कमी करून अधिक वेगाने काम करणाऱ्या लहान टीम्स तयार करण्यावर भर दिला जात आहे. कंपनीने यापूर्वी जाहीर केलेली ६,००० नवीन पदांची भरती योजना देखील रद्द केली आहे. इंजिनिअरिंग आणि प्रॉडक्ट विभागावर या कपातीचा सर्वाधिक परिणाम झाला आहे.
Mark Zuckerberg यांनी AI ला कंपनीचे सर्वोच्च प्राधान्य दिले असून, यंदा AI क्षेत्रावर तब्बल १२५ ते १४५ अब्ज डॉलर्स खर्च करण्याची योजना कंपनीने आखली आहे.
कर्मचाऱ्यांवर गुप्त पाळत?
या प्रकरणादरम्यान आणखी एक धक्कादायक बाब समोर आली आहे. कंपनी कर्मचाऱ्यांच्या माऊस हालचाली, टायपिंग पद्धती आणि कीबोर्ड वापरावर गुप्तपणे नजर ठेवत असल्याचा आरोप करण्यात आला आहे. या डेटाच्या आधारे AI प्रणालींना प्रशिक्षण देण्याचा प्रयत्न सुरू असल्याचे वृत्त आहे.
या कथित पाळत ठेवण्याच्या प्रकाराला कर्मचाऱ्यांकडून तीव्र विरोध झाला असून, १,००० हून अधिक कर्मचाऱ्यांनी निषेध याचिकेवर स्वाक्षऱ्या केल्याची माहिती समोर आली आहे.
आयटी क्षेत्रात कर्मचारी कपातीची लाट
मेटासोबतच इतर अनेक मोठ्या तंत्रज्ञान कंपन्यांनीही मोठ्या प्रमाणावर कर्मचारी कपात केली आहे.
- Cisco Systems ने गेल्या आठवड्यात सुमारे ४,००० कर्मचाऱ्यांना कामावरून कमी केले.
- Oracle ने एप्रिल महिन्यात हजारो कर्मचाऱ्यांना ईमेलद्वारे सेवामुक्त केले.
- Microsoft, Amazon, Disney आणि ASML यांनीही कर्मचारी कपात किंवा स्वेच्छानिवृत्ती कार्यक्रम जाहीर केले आहेत.
“हा तात्पुरता नव्हे, तर कायमस्वरूपी बदल”
तज्ज्ञांच्या मते, आयटी क्षेत्रात सुरू असलेले बदल हे केवळ आर्थिक मंदीमुळे नसून, AI आणि ऑटोमेशनमुळे उद्योगाची रचना कायमस्वरूपी बदलत आहे. भविष्यात सामान्य कोडिंगपेक्षा AI प्रणालींची रचना, व्यवस्थापन आणि संचालन करणाऱ्या तज्ज्ञांची मागणी वाढणार असल्याचे मत व्यक्त करण्यात येत आहे.
तज्ज्ञांचे म्हणणे आहे की, भविष्यात टिकून राहण्यासाठी कर्मचाऱ्यांना पारंपरिक कामकाजापलीकडे जाऊन AI-आधारित कौशल्य आत्मसात करावे लागणार आहे.