जगभरातील अब्जावधी वापरकर्त्यांसाठी महत्त्वाची बातमी समोर आली आहे. अनेक वर्षांपासून गुगल आपल्या प्रत्येक खात्यासोबत १५ जीबी मोफत क्लाउड स्टोरेज देत होते. मात्र आता कंपनी हे धोरण बदलण्याच्या तयारीत असल्याचे संकेत मिळत आहेत. सोशल मीडियावर व्हायरल झालेल्या काही स्क्रीनशॉट्सनुसार, गुगल नवीन वापरकर्त्यांसाठी फ्री स्टोरेज मर्यादा १५ जीबीवरून ५ जीबीपर्यंत कमी करण्याची चाचणी करत आहे.
नवीन धोरणानुसार, जर वापरकर्त्याने आपला फोन नंबर गुगल खात्याशी लिंक केला नाही, तर त्याला फक्त ५ जीबी स्टोरेज मिळेल. मात्र फोन नंबर जोडल्यास पूर्वीप्रमाणे पूर्ण १५ जीबी मोफत स्टोरेज उपलब्ध होईल. हे स्टोरेज Gmail, Google Drive आणि Google Photos साठी वापरता येणार आहे.
सोशल मीडियावर चर्चेला उधाण
रेडिटवरील काही वापरकर्त्यांनी नवीन Gmail खाते तयार करताना दिसलेली नोटिफिकेशन शेअर केली आहे. त्यात वापरकर्त्यांना दोन पर्याय दिले जात असल्याचे दिसते:
५ जीबी मोफत स्टोरेज कायम ठेवणे
किंवा
फोन नंबर जोडून १५ जीबी स्टोरेज अनलॉक करणे
नोटिफिकेशनमध्ये असेही नमूद करण्यात आले आहे की, “प्रत्येक व्यक्तीला फक्त एकदाच मोफत स्टोरेज मिळावे यासाठी फोन नंबरचा वापर केला जाईल.”
गूगलचा उद्देश काय?
गुगल “एक व्यक्ती, एक खाते” ही संकल्पना अधिक प्रभावीपणे लागू करण्याचा प्रयत्न करत असल्याचे बोलले जात आहे. कंपनीच्या मते, फोन नंबर अनिवार्य केल्यामुळे बनावट खाती, स्पॅम आणि बॉट अकाउंट्सवर नियंत्रण ठेवणे सोपे होईल.
विशेष म्हणजे, कंपनीने याबाबत कोणतीही मोठी अधिकृत घोषणा केलेली नाही. मात्र इंटरनेट आर्काइव्हच्या वेबॅक मशीननुसार, मार्च २०२६ मध्ये गुगलने आपल्या सपोर्ट पेजवरील मजकूर बदलला आहे. पूर्वी “१५ जीबी मोफत स्टोरेज” असा उल्लेख होता, तो आता “१५ जीबी पर्यंत मोफत स्टोरेज” असा करण्यात आला आहे.
विद्यमान वापरकर्त्यांना काय परिणाम?
ज्या वापरकर्त्यांकडे आधीपासून १५ जीबी स्टोरेज असलेले गुगल खाते आहे, त्यांच्यावर सध्या कोणताही परिणाम होणार नसल्याचे दिसते. मात्र नवीन खाते तयार करणाऱ्यांना पूर्ण स्टोरेज मिळवण्यासाठी फोन नंबर देणे आवश्यक ठरू शकते.
तंत्रज्ञान क्षेत्रातील तज्ज्ञांच्या मते, भविष्यात गुगलची ही पद्धत सर्व वापरकर्त्यांसाठी लागू होण्याची शक्यता नाकारता येत नाही. त्यामुळे गोपनीयता आणि डेटा सुरक्षिततेबाबतही नव्या चर्चांना सुरुवात झाली आहे.