जगातील सर्वाधिक वापरल्या जाणाऱ्या वेब ब्राउझरपैकी एक असलेल्या Google Chrome संदर्भात मोठा सायबर सुरक्षा इशारा जारी करण्यात आला आहे. ब्राउझरमध्ये गंभीर सुरक्षा त्रुटी आढळल्यामुळे वापरकर्त्यांचे पासवर्ड, बँकिंग माहिती आणि इतर संवेदनशील डेटा हॅक होण्याचा धोका निर्माण झाला आहे.
भारतीय सायबर सुरक्षा संस्था CERT-In ने या पार्श्वभूमीवर अलर्ट जारी करत वापरकर्त्यांना तात्काळ ब्राउझर अपडेट करण्याचा सल्ला दिला आहे. विशेषतः भारतातील लाखो लोक कार्यालयीन तसेच वैयक्तिक कामांसाठी क्रोमचा वापर करत असल्याने हा इशारा अत्यंत महत्त्वाचा मानला जात आहे.
कोणत्या आवृत्त्यांना सर्वाधिक धोका?
CERT-In च्या माहितीनुसार, लिनक्स सिस्टीमवरील 148.0.7778.96 पेक्षा जुन्या आवृत्त्या तसेच विंडोज आणि मॅकवरील 148.0.7778.96/97 या आवृत्त्यांमध्ये गंभीर सुरक्षा त्रुटी आढळल्या आहेत.
सायबर हल्लेखोर वापरकर्त्यांना बनावट वेबसाइट्स किंवा संशयास्पद लिंकवर क्लिक करण्यास भाग पाडून या त्रुटींचा फायदा घेऊ शकतात. त्यानंतर हॅकर्स वापरकर्त्यांचे सेव्ह केलेले पासवर्ड, नेट बँकिंग माहिती आणि इतर खाजगी डेटा चोरू शकतात. काही प्रकरणांमध्ये डिव्हाइस क्रॅश होणे किंवा सुरक्षा प्रणाली बायपास होण्याचाही धोका असल्याचे सांगण्यात आले आहे.
क्रोममध्ये नेमक्या कोणत्या त्रुटी?
सायबर सुरक्षा तज्ज्ञांच्या मते, क्रोमच्या अनेक अंतर्गत प्रणालींमध्ये त्रुटी आढळल्या आहेत. त्यामध्ये —
- रेंडरिंग इंजिनमधील दोष
- ग्राफिक्स प्रोसेसिंगमधील त्रुटी
- मेमरी हाताळणी प्रणालीतील समस्या
- इनपुट व्हॅलिडेशनमधील कमतरता
- सुरक्षा धोरण बायपास करण्याच्या त्रुटी
यांचा समावेश आहे. या त्रुटींमुळे हल्लेखोरांना सिस्टीममध्ये मालवेअर इन्स्टॉल करणे किंवा डेटा चोरी करणे सोपे होऊ शकते.
स्वतःचे संरक्षण कसे कराल?
CERT-In ने सर्व वापरकर्त्यांना त्यांचा Google Chrome ब्राउझर तातडीने अपडेट करण्याचा सल्ला दिला आहे. गूगलने या त्रुटी दूर करण्यासाठी नवीन सुरक्षा पॅचेस जारी केले आहेत.
Chrome अपडेट करण्याची पद्धत :
- Google Chrome उघडा
- वरच्या उजव्या कोपऱ्यातील तीन ठिपक्यांवर क्लिक करा
- “Help” विभागात जा
- “About Google Chrome” वर क्लिक करा
- नवीन अपडेट उपलब्ध असल्यास ते डाउनलोड करून इन्स्टॉल करा
सायबर सुरक्षा तज्ज्ञांच्या मते, मोबाईल आणि संगणकातील सर्व अॅप्स व सॉफ्टवेअर नियमितपणे अपडेट ठेवणे आवश्यक आहे. नियमित अपडेट्समुळे सायबर हल्ले आणि डेटा चोरीचा धोका मोठ्या प्रमाणात कमी होतो.