टोलेडो प्रांताजवळ भीषण दुर्घटना; माद्रिद, स्युदाद रियाल आणि आंदालुसियामधील रेल्वे सेवा स्थगित, बचावकार्य सुरू
स्पेन : स्पेनमध्ये दोन हाय-स्पीड रेल्वे गाड्यांची धडक होऊन भीषण दुर्घटना घडली आहे. मध्य स्पेनमधील टोलेडो प्रांताजवळ बुधवारी सकाळी झालेल्या या अपघातात आतापर्यंत ४६ जणांचा मृत्यू झाल्याची माहिती समोर आली असून, अनेक प्रवासी जखमी झाले आहेत. स्पॅनिश प्रशासनाने या घटनेला दुजोरा दिला आहे. अपघातानंतर बचावकार्य सुरू करण्यात आले असून, सुरक्षिततेच्या कारणास्तव काही महत्त्वाच्या मार्गांवरील रेल्वे वाहतूक थांबवण्यात आली आहे.
स्पेनमधील रेल्वे पायाभूत सुविधांचे व्यवस्थापन करणाऱ्या ‘एडीआयएफ’ (ADIF) या संस्थेने बुधवारी सकाळी टोलेडो प्रांतात दुर्घटना घडल्याची माहिती दिली. अपघाताचे नेमके कारण शोधण्यासाठी तपास सुरू असून, रेल्वे मार्ग सुरक्षित असल्याची खात्री होईपर्यंत संबंधित मार्गांवरील वाहतूक पुन्हा सुरू केली जाणार नसल्याचे अधिकाऱ्यांनी स्पष्ट केले आहे.
Death toll rises to 46 after trains collide near Toledo, Spain - Okdiario https://t.co/QcZubSqlwW
— Record GBA (@RecordGBA) October 28, 2026
एकाच दिशेने जाणाऱ्या गाड्यांची धडक
प्राथमिक वृत्तानुसार, दोन्ही रेल्वे गाड्या एकाच दिशेने प्रवास करत होत्या. यावेळी मागून येणाऱ्या एका गाडीची पुढे असलेल्या दुसऱ्या गाडीच्या मागील भागाला जोरदार धडक बसली. धडकेची तीव्रता इतकी होती की, एका रेल्वे गाडीचे दोन डबे रुळांवरून घसरले.
घटनेची माहिती मिळताच बचाव पथके घटनास्थळी दाखल झाली. जखमी प्रवाशांना डब्यांमधून बाहेर काढून त्यांना आवश्यक वैद्यकीय मदत देण्याचे काम सुरू करण्यात आले. दुर्घटनेत जखमी झालेल्यांची संख्या आणि त्यांच्या प्रकृतीबाबत अधिक माहिती समोर येण्याची प्रतीक्षा आहे.
📍Tragic train accident in Spain; 46 dead.. Two high-speed trains collided, resulting in 46 deaths; over 156 people have been injured and transported to hospitals.. https://t.co/5hdd7NcNL9
— Aravinda reddy (@arareddye) October 28, 2026
तीन प्रमुख भागांतील रेल्वे वाहतूक बंद
अपघातानंतर माद्रिद, स्युदाद रियाल आणि आंदालुसिया यांना जोडणारी रेल्वे सेवा पूर्णपणे स्थगित करण्यात आली आहे. अपघाताची चौकशी पूर्ण होऊन मार्ग सुरक्षित असल्याचे स्पष्ट होईपर्यंत या मार्गांवर गाड्या चालवण्यात येणार नाहीत, अशी माहिती अधिकाऱ्यांनी दिली.
या निर्णयामुळे संबंधित मार्गांवरील रेल्वे प्रवाशांना अडचणींचा सामना करावा लागू शकतो. मात्र, प्रवाशांची सुरक्षितता लक्षात घेऊन वाहतूक बंद ठेवण्यात आली आहे.
जखमी प्रवाशांसाठी क्रीडा संकुलाची व्यवस्था
उर्डा शहराचे महापौर मॅन्युएल गालन यांनी स्पेनच्या टीव्हीई (TVE) या वृत्तवाहिनीशी बोलताना अपघातात अनेक प्रवासी जखमी झाल्याची माहिती दिली. जखमींची काळजी घेण्यासाठी स्थानिक प्रशासनाने तयारी सुरू केली आहे.
‘सिव्हिल प्रोटेक्शन’च्या अधिकाऱ्यांनी नगर प्रशासनाशी संपर्क साधून प्रवाशांना तात्पुरता आधार देण्यासाठी स्थानिक क्रीडा संकुल अर्थात स्पोर्ट्स पॅव्हेलियन तयार ठेवण्याची विनंती केली आहे. जखमींना प्राथमिक उपचार देणे आणि आवश्यकतेनुसार रुग्णालयात दाखल करणे, यासाठी स्थानिक यंत्रणा कार्यरत आहे.
दरम्यान, जवळच्या लॉस येबेनेस गावाचे महापौर जेसुस पेरेझ यांनीही टीव्हीईशी बोलताना या दुर्घटनेचे गांभीर्य अधोरेखित केले. अपघातातील मृतांचा आकडा, जखमींची स्थिती आणि दुर्घटनेमागील कारणांबाबत पुढील तपासातून अधिक माहिती मिळण्याची अपेक्षा आहे.