रणबीर कपूर यांच्या मुख्य भूमिकेत साकारला जाणारा रामायण हा २०२६ मधील सर्वाधिक चर्चेत असलेला आणि बहुप्रतिक्षित चित्रपट ठरत आहे.
मुंबई (Ramayan) : रणबीर कपूर यांच्या मुख्य भूमिकेत साकारला जाणारा रामायण हा २०२६ मधील सर्वाधिक चर्चेत असलेला आणि बहुप्रतिक्षित चित्रपट ठरत आहे. तब्बल ४००० कोटींच्या भव्य बजेटमुळे या सिनेमाची जोरदार चर्चा रंगली असून, कलाकार आणि प्रेक्षकांकडून संमिश्र प्रतिक्रिया उमटताना दिसत आहेत. काहींनी रणबीरच्या प्रभू रामाच्या भूमिकेचं कौतुक केलं आहे, तर काहींनी चित्रपटावर टीकेची झोड उठवली आहे. विशेष म्हणजे, सोशल मीडियावर या चित्रपटाची तुलना थेट १९८० च्या दशकातील गाजलेल्या रामायण मालिकेशी केली जात आहे.
दरम्यान, या मालिकेत सीतेची भूमिका साकारून घराघरात पोहोचलेल्या दीपिका चिखलिया यांच्या एका सोशल मीडिया पोस्टने सध्या चांगलाच चर्चेचा विषय निर्माण केला आहे. त्यांनी इन्स्टाग्राम स्टोरीद्वारे अप्रत्यक्षपणे मत व्यक्त करत, “रामायण असं तयार व्हावं की, कोणीही कितीही मोठा खर्च केला तरी त्याची सर येऊ नये,” असा आशय व्यक्त केला. त्यांच्या या वक्तव्याकडे चित्रपटावर टीका म्हणून पाहिलं जात असलं, तरी त्यांनी यापूर्वी चित्रपटाच्या टीझरचं कौतुक केल्याचंही समोर आलं आहे. एका मुलाखतीत त्यांनी या प्रोजेक्टबद्दल उत्सुकता व्यक्त केली होती.
१९८० च्या दशकात रामानंद सागर यांनी साकारलेली ‘रामायण’ मालिका आजही प्रेक्षकांच्या मनात विशेष स्थान राखून आहे. या मालिकेमुळे अरुण गोविल आणि दीपिका चिखलिया यांना मोठी लोकप्रियता मिळाली होती.
चित्रपटाच्या प्रदर्शनाबाबत बोलायचं झाल्यास, ‘रामायण’चा पहिला भाग येत्या दिवाळीत प्रेक्षकांच्या भेटीला येणार आहे, तर दुसरा भाग पुढील वर्षीच्या दिवाळीत प्रदर्शित करण्याची योजना आहे. या भव्य प्रोजेक्टमध्ये रणबीर कपूरसोबत साई पल्लवी सीतेच्या भूमिकेत दिसणार असून, यश रावणाची भूमिका साकारणार आहेत. चित्रपटातील व्हिज्युअल इफेक्ट्सची जबाबदारी ऑस्करविजेती DNEG या कंपनीकडे असून, निर्मिती नमित मल्होत्रा करत आहेत.