पुण्यातील ‘ग्लोबल मराठा एक्स्पो’ मराठी उद्योजकांसाठी सुवर्णसंधी: संजय पाटील वायाळ 

सिंदखेड राजा (Global Maratha Expo) : मराठी उद्योजकांना जागतिक स्तरावर ओळख निर्माण करून देण्यासाठी पुण्यात आयोजित करण्यात आलेल्या ‘ग्लोबल मराठा एक्स्पो २०२६’ च्या जनजागृतीसाठी सिंदखेड राजा येथे विशेष संवाद सत्राचे आयोजन करण्यात आले होते. येथील शासकीय विश्रामगृहावर ईश्वद बायोटेकचे संचालक संजय वायाळ यांनी पत्रकारांशी संवाद साधून या भव्य प्रदर्शनाबाबत सविस्तर माहिती दिली. यावेळी व्यासपीठावर तहसीलदार अजित दिवटे, सुधाकर पाटील यांच्यासह एक्स्पोचे विविध पदाधिकारी प्रामुख्याने उपस्थित होते.
   
पत्रकारांशी बोलताना संजय वायाळ (Sanjay Patil Wayal) म्हणाले की, "आजच्या स्पर्धात्मक युगात मराठी उद्योजकांनी केवळ स्थानिक न राहता जागतिक बाजारपेठेचा विचार करणे आवश्यक आहे. या एक्स्पोच्या माध्यमातून १००० हून अधिक स्टॉल्सच्या माध्यमातून विविध क्षेत्रातील उद्योग आपले सादरीकरण करणार आहेत. कृषी, तंत्रज्ञान, स्टार्टअप आणि सेवा क्षेत्रातील नवीन संधींची माहिती याठिकाणी मिळणार आहे."

 तहसीलदार अजित दिवटे यांनी या (Global Maratha Expo) उपक्रमाचे कौतुक करत सांगितले की, ग्रामीण भागातील सुशिक्षित बेरोजगार तरुण आणि नवउद्योजकांनी अशा प्रदर्शनांना भेट देऊन व्यवसायातील आधुनिक तंत्रज्ञान समजून घेतले पाहिजे. प्रशासकीय स्तरावरही अशा विधायक उपक्रमांना नेहमीच प्रोत्साहन दिले जाईल, असे त्यांनी नमूद केले.१५, १६ आणि १७ मे २०२६, मोशी प्रदर्शन केंद्र, पुणे. ७ ते १० लाख भेटी देणाऱ्यांची शक्यता आणि विविध क्षेत्रातील मान्यवरांची उपस्थिती. स्टार्टअप फंड, एआय (AI) तंत्रज्ञान आणि सरकारी योजनांवर विशेष चर्चासत्रे. यावेळी एक्स्पोच्या पदाधिकाऱ्यांनी सिंदखेड राजा तालुक्यातील जास्तीत जास्त तरुण उद्योजकांनी आणि शेतकऱ्यांनी या प्रदर्शनाचा लाभ घेण्याचे आवाहन केले.