नाशिक (Ashok Kharat) : स्वयंघोषित ज्योतिषी अशोक खरात उर्फ “कॅप्टन” याच्याविरोधात दाखल झालेल्या बलात्कार, लैंगिक शोषण आणि ब्लॅकमेलिंगच्या गंभीर प्रकरणाने राज्यभरात मोठी खळबळ उडवली आहे. या प्रकरणात न्यायालयाने आरोपीला ७ दिवसांची पोलीस कोठडी सुनावली असून गुन्ह्याचे स्वरूप लक्षात घेता पोलिसांकडून बहुआयामी तपास सुरू करण्यात आला आहे.
मिळालेल्या माहितीनुसार, एका पीडित महिलेने दिलेल्या तक्रारीत अशोक खरात (Ashok Kharat) हा भविष्य सांगण्याच्या बहाण्याने लोकांचा विश्वास संपादन करत असल्याचे नमूद केले आहे. दैवी शक्ती असल्याचा दावा करून तो महिलांना आपल्या जाळ्यात ओढत असे. त्यानंतर गुंगीकारक पदार्थ देऊन त्यांच्यावर वारंवार अत्याचार केल्याचा आरोप तक्रारीत करण्यात आला आहे. हा प्रकार मागील काही वर्षांपासून सुरू असल्याची प्राथमिक माहिती समोर आली आहे.
या प्रकरणातील तपासादरम्यान पोलिसांनी आरोपीच्या निवासस्थानासह इतर ठिकाणी छापेमारी केली. या कारवाईत एक पेनड्राईव्ह जप्त करण्यात आली असून त्यामध्ये ५० हून अधिक आक्षेपार्ह व्हिडिओ सापडल्याची माहिती पुढे आली आहे. या व्हिडिओंच्या आधारे महिलांना ब्लॅकमेल करून त्यांच्याकडून आर्थिक व इतर प्रकारचे फायदे घेतल्याचा संशय व्यक्त केला जात आहे. संबंधित व्हिडिओंची फॉरेन्सिक तपासणी सुरू असून त्यातून आणखी धक्कादायक माहिती समोर येण्याची शक्यता आहे.
अशोक खरात प्रकरणात छापेमारीत पेनड्राईव्ह जप्त
तसेच, या प्रकरणात अघोरी प्रथा, तांत्रिक विधी आणि अंधश्रद्धेचा आधार घेत महिलांची फसवणूक केल्याचा आरोपही समोर येत आहे. आरोपी स्वतःला प्रभावशाली व्यक्ती म्हणून सादर करून पीडितांवर मानसिक दबाव टाकत असल्याचेही तपासातून उघड होत आहे. दरम्यान, आरोपीचे काही राजकीय, प्रशासकीय तसेच प्रभावशाली व्यक्तींशी संबंध असल्याची चर्चा सध्या रंगत आहे. त्यामुळे या प्रकरणाला अधिक संवेदनशील व गंभीर वळण मिळाले असून तपास यंत्रणांवर सत्य समोर आणण्याचा मोठा दबाव आहे.
