प्रमाणीकरण न केल्यास सिलिंडर मिळेल, मात्र अनुदानाचा लाभ मिळणार नाही
नवी दिल्ली/ मुंबई (LPG Aadhaar Biometric) : घरगुती एलपीजी सिलिंडरवर अनुदानाचा लाभ घेणाऱ्या ग्राहकांसाठी महत्त्वाचा बदल करण्यात आला आहे. 1 ऑक्टोबर 2026 पासून अनुदानासह नियंत्रित दरात एलपीजी रिफिल मिळवण्यासाठी आधार बायोमेट्रिक प्रमाणीकरण (BAA) पूर्ण करणे अनिवार्य करण्यात आले आहे. पेट्रोलियम आणि नैसर्गिक वायू मंत्रालयाने याबाबत माहिती दिली आहे. 19 सप्टेंबरपर्यंत देशातील 27.43 कोटी सक्रिय घरगुती एलपीजी ग्राहकांपैकी सुमारे 89.9 टक्के ग्राहकांनी आधार प्रमाणीकरण पूर्ण केले आहे. त्यामुळे या ग्राहकांना पुन्हा प्रमाणीकरण करण्याची आवश्यकता नाही. मात्र, (LPG Aadhaar Biometric) अद्याप प्रमाणीकरण न केलेल्या ग्राहकांना अनुदानाचा लाभ मिळवण्यासाठी ही प्रक्रिया पूर्ण करावी लागणार आहे.
कुठे करता येणार प्रमाणीकरण?
एलपीजी ग्राहकांना (LPG Aadhaar Biometric) आधार प्रमाणीकरणाची प्रक्रिया सिलिंडरच्या घरपोच वितरणावेळी, गॅस वितरकाच्या कार्यालयात किंवा संबंधित तेल विपणन कंपनीच्या मोबाइल ॲपद्वारे पूर्ण करता येईल. इंडेन ग्राहकांसाठी ‘इंडियनऑइल वन’, भारतगॅस ग्राहकांसाठी ‘हॅलोबीपीसीएल’, तर एचपी गॅस ग्राहकांसाठी ‘एचपी पे’ या ॲपचा पर्याय उपलब्ध आहे.
सिलिंडर मिळणे बंद होणार नाही
आधार बायोमेट्रिक (LPG Aadhaar Biometric) प्रमाणीकरण न केल्यास ग्राहकांना एलपीजी सिलिंडर मिळणे बंद होणार नाही. मात्र, अनुदानाचा लाभ मिळणार नसून सिलिंडर बाजारभावाने खरेदी करावा लागेल. सरकारच्या म्हणण्यानुसार, अनुदानाचा लाभ केवळ पात्र ग्राहकांपर्यंत पोहोचवणे तसेच दुबार आणि अपात्र एलपीजी जोडण्या रोखणे, हा या निर्णयामागील प्रमुख उद्देश आहे.
