अयोध्या प्रसादाच्या नावाने मिठाई विक्री; ॲमेझॉनवर दंडात्मक कारवाई

नवी दिल्ली (Ayodhya Ram Mandir Prasad) : अयोध्येतील राम मंदिराचा प्रसाद असल्याचा दावा करून मिठाई व खाद्यपदार्थांची विक्री केल्याप्रकरणी ग्राहक न्यायाधिकरणाने ॲमेझॉनला एक लाख रुपयांचा दंड ठोठावला आहे. ‘संधू ट्रेडिंग कंपनी’च्या ‘बीगरी ब्रदर्स’ या ब्रँडमार्फत हे पदार्थ विकले जात होते.

तुपाचे लाडू, गोव्याचे लाडू, पूंडीचे लाडू आणि गायीच्या दुधाचे पेढे यांची विक्री करण्यात आली. उत्पादनांच्या वर्णनात ‘अयोध्या राम मंदिराचा प्रसाद’ आणि ‘श्रीरामांचा आशीर्वाद’ असा उल्लेख करण्यात आला होता. त्यामुळे ग्राहकांनी हे पदार्थ मंदिरातील प्रसाद (Ayodhya Ram Mandir Prasad) असल्याचे समजून खरेदी केल्याचे तक्रारीत नमूद करण्यात आले. कॉन्फेडरेशन ऑफ ऑल इंडिया ट्रेडर्सने जानेवारी २०२४ मध्ये यासंदर्भात तक्रार दाखल केली होती. त्यानंतर झालेल्या सुनावणीत न्यायाधिकरणाने ॲमेझॉन केवळ मध्यस्थ असल्याचे सांगून जबाबदारी झटकू शकत नाही, असे स्पष्ट केले. ग्राहकांची दिशाभूल करणाऱ्या उत्पादनांच्या विक्रीवर नियंत्रण ठेवण्याची जबाबदारीही व्यासपीठावर असल्याचे निरीक्षण नोंदवण्यात आले.