टिप्परने दुचाकीस्वार मायलेकास चिरडले...

तिरोडा (Tiroda Accidental Death) : तिरोडा-तुमसर मार्गावरील सुकडी नाका परिसरात एका भीषण रस्ते अपघातात मायलेकाचा दुर्दैवी अंत झाला.  एका भरधाव टिप्परने दुचाकीला पाठीमागून जोरदार धडक देत चिरडले. ही घटना आज (ता.२३) सायंकाळी ४.३५ वाजता सुमारासची आहे. या घटनेत मायलेकाचा जागीच मृत्यू झाला तर एक जण गंभीर जखमी झाला आहे. हंसलता चौधरी (३५) आणि तन्मय चौधरी (९) रा.कासा, काटी-बिरसोला असे मृतांची नावे आहेत. तर दुचाकी चालक मृतक महिलेचा पती गंभीर जखमी झाला आहे.

सविस्तर असे की, चौधरी कुटुंब हे दुचाकी क्रमांक एमएच-३५/ एव्ही- ४१०२ ने कासावरून नागपूरकडे जात होते. तुमसर-तिरोडा मार्गावर सुकडी फाट्याजवळ सायंकाळी ४:४५ च्या सुमारास काळ बनून आलेल्या  एका भरधाव टिप्परने दुचाकीला जबर धडक देत चिरडत नेले. (Tiroda Accidental Death) धडक इतकी भीषण होती की, हंसलता आणि तन्मय या दोघांचाही घटनास्थळीच मृत्यू झाला. अपघातानंतर चालक टिप्परसह घटनास्थळावरून फरार झाला आहे. अपघात घडताच परिसरातील नागरिकांना घटनास्थळी धाव घेत मदतकार्य सुरू केले. तसेच पोलिसांना या घटनेची माहिती देण्यात आली. या घटनेची माहिती मिळताच तिरोडा पोलिसांनी घटनास्थळी पंचनामा केला तसेच मृतदेह उत्तरीय तपासणीकरीता उपजिल्हा रूग्णालयात पाठविले. या प्रकरणी गुन्हा नोंद करून तिरोडा पोलिस फरार टिप्पर आणि चालकाचा शोध घेत आहेत. या अपघातामुळे परिसरात हळहळ व्यक्त केली जात आहे.

गुरूवार दुसर्‍यांदा ठरला ‘काळ’वार

तिरोडा तालुक्यात सतत दोन (Tiroda Accidental Death) आवठड्यापासून गुरूवार दिवस काळाचा दिवस म्हणून चर्चेत आला आहे. मागच्या गुरूवारी (ता.१६) कोळसा वाहतूक करणार्‍या ट्रकने दुचाकीला स्वार जबर धडक दिली होती. यात डिलेश पारधी याचा जागीच मृत्यू झाला. तर आज (ता.२३) पुन्हा एका भरधाव टिप्परने दुचाकीला धडक दिल्याने एकाच कुटूंबातील मायलेक ठार झाले तर महिलेचा पती जखमी झाला. सततच्या प्राणांतिक घटनांमुळे गुरूवार तिरोड्यासाठी काळवार ठरत असल्याची प्रतिक्रिया उमटू लागली आहे.