परभणीत पाच वर्षापासून फरार असलेला अट्टल गुन्हेगार ताब्यात

घरफोडी, चोरीच्या सहा गुन्ह्यांची उकल ४ लाख रुपयांचा मुद्देमाल जप्त...!

परभणी (Parbhani's notorious criminal) : सोनपेठ  गंगाखेड पोलीस ठाणे हद्दित झालेल्या घरफोडीच्या गुन्ह्यात आरोपींचा शोध घेताना पाच वर्षापासून फरार असलेला घरफोडी करणारा अट्टल गुन्हेगार स्थानिक गुन्हे शाखेच्या पथकाने ताब्यात घेतला आहे. संबंधिताजवळून दागिने, रोख रक्कम मिळून ४ लाख २ हजार ५५८ रुपयांचा मुद्देमाल जप्त करण्यात आला आहे. आरोपीच्या चौकशीत घरफोडी आणि चोरीच्या सहा गुन्ह्यांची उकल झाली आहे. पुढील तपासासाठी आरोपीस गंगाखेड पोलीस ठाण्यात हजर करण्यात आले आहे.

पोलीस अधीक्षक पंकज कुमावत यांच्या आदेशाने तसेच स्थागुशाचे पोनि. गजेंद्र सरोदे यांच्या मार्गदर्शनाखाली पोउपनि. चंदनसिंह परिहार, पोलीस अंमलदार महेश कौठाळे, राहुल परसोडे, माणिक वाघ, रंगनाथ दुधाटे, सचिन भदर्गे, गजानन क्षिरसागर, शरद सावंत, दिलीप निलपत्रेवार, जयश्री आव्हाड, उत्तम हनवते यांच्या पथकाने कारवाई केली. गोपनीय माहितीवरुन उक्कडगाव शिवारात कारवाई करण्यात आली. आरोपी सचिन उर्फ बबड्या बापुराव उर्फ बाळू भोसले हा दुचाकीवरुन लिंबा गावाकडे जात असताना त्याला पकडण्यात आले. विश्वासात घेऊन चौकशी केल्यावर संबंधिताने गंगाखेड, सोनपेठ, पालम, पूर्णा तसेच परळी तालुक्यात जायक्या तुकाराम शिंदे, सुर्‍या उर्फ श्रीकांत चव्हाण, छोटा मोहन भोसले यांच्या सोबत मिळून घरफोड्या केल्याचे सांगितले.संबंधिता जवळून सोन्या- चांदीचे दागिने आणि रोकड जप्त करण्यात आली आहे.