औंढ्यात मुंडे पॅटर्नचा धसका: अवैध गुटख्याची दोन पोती रस्त्यावर फेकून आरोपी फरार, पोलिसांकडून जप्त

औंढा नागनाथ (Aundha Nagnath illegal gutkha) : येथे अवैध गुटखा विक्रेत्यांनी तुकाराम मुंडे पॅटर्नचा धसका घेतला असून शिक्षक कॉलनी भागातील कनकेश्वरी मंदिर रोड लगत अवैध गुटख्याची दोन पोते अज्ञात व्यक्तीने फेकून देऊन पळ काढल्याची घटना दिनांक १९ जून रोजी सायंकाळी साडेचार वाजेच्या सुमारास उघडकीस आली. या प्रकरणाची माहिती मिळताच औंढा नागनाथ पोलिसांनी तात्काळ घटनास्थळी धाव घेतली. पोलीस निरीक्षक शामकुमार डोंगरे, पोलीस उपनिरीक्षक श्रीधर वाघमारे, जमादार संतोष पवार व एजाज पटेल यांनी पाहणी केली असता तिथे 'गोवा' नावाचा गुटखा भरलेली दोन पोती आढळून आली.

पोलिसांनी सदर गुटखा जप्त करून पोलीस ठाण्यात आणला आहे. त्याची मोजणी करून या (Aundha Nagnath illegal gutkha) प्रकरणी गुन्हा दाखल करण्याची प्रक्रिया सुरू आहे. गुटखा फेकून फरार झालेल्या आरोपीचा शोध घेतला जात आहे. दरम्यान मुंडे पॅटर्नमुळे औंढा नागनाथ शहरासह तालुक्यात गुटखा माफीयांनी चांगलाच धसका घेतला आहे. त्यामुळे अनेक ठिकाणी जमा केलेला अवैध गुटखा फेकून दिला जात आहे. फेकून दिलेला गुटखा जप्त करून संबंधित माफीयांवर कडक कारवाई करण्यात येणार असल्याचे पोलीस निरीक्षक शामकुमार डोंगरे यांनी सांगितले.