लातूर पोलिसांचे ‘ऑलआऊट’ व ‘कोंबिंग ऑपरेशन'!

लातूर (Latur Police Mission) : लातूर जिल्ह्यात कायदा व सुव्यवस्था अबाधित ठेवण्यासाठी तसेच गुन्हेगारी प्रवृत्तीवर प्रभावी नियंत्रण आणण्यासाठी लातूर पोलीस दलाच्या वतीने दि. २४ ते २५ एप्रिल २०२६ च्या मध्यरात्री अचानकपणे जिल्हाभरात ‘ऑलआऊट’ व ‘कोंबिंग ऑपरेशन’ राबविण्यात आले. या मोहिमेदरम्यान ६ जणांवर शस्त्र अधिनियमांतर्गत गुन्हे दाखल करण्यात आले असून त्यांच्या ताब्यातील अवैध शस्त्रे जप्त करण्यात आली. तर गुन्हे करण्याच्या उद्देशाने संशयास्पदरित्या वावरणाऱ्या ११ गुन्हे दाखल करण्यात आले.

ऑपरेशनअंतर्गत 127 रेकॉर्डवरील घरफोडी व (Latur Police Mission) इतर गुन्ह्यांतील सराईत आरोपींच्या राहत्या घरी भेट देऊन त्यांच्या हालचालींची माहिती घेण्यात आली. तसेच त्यांना भविष्यात कोणतेही समाजविघातक कृत्य न करण्याबाबत समज देण्यात आली. ११० लॉजेस व हॉटेल्सची तपासणी करण्यात आली असून ३० संवेदनशील (मर्मस्थळ) ठिकाणांना भेटी देण्यात आल्या आहेत. जिल्ह्यात विविध ३१ ठिकाणी नाकाबंदी करून ८२७ संशयित वाहनांची तपासणी करण्यात आली. या तपासणीमुळे संशयित हालचालींवर नियंत्रण ठेवण्यास मदत झाली. तसेच मद्यपान करून वाहन चालविणाऱ्या 22 वाहनचालका विरुद्ध खटले दाखल करण्यात आले आहेत.

31 अधिकारी 106 पोलीस आणि 88 होमगार्ड सहभागी 

पोलीस अधीक्षक अमोल तांबे यांच्या आदेशान्वये तसेच अपर पोलीस अधीक्षक मंगेश चव्हाण यांच्या मार्गदर्शनाखाली ही विशेष मोहीम राबविण्यात आली. (Latur Police Mission) सदर मोहिमेत लातूर जिल्हा पोलीस दलातील एकूण 31 पोलीस अधिकारी ,106 पोलीस अंमलदार आणि 88 होमगार्ड हे सहभागी झाले होते.