ड्रोनच्या मदतीने उसाच्या शेतातून खुनातील आरोपीला अटक

पोलिसांचा तांत्रिक तपास 

जवळाबाजार (Murder Accused Arrested) : येथे शनिवारी पहाटे उघडकीस आलेल्या खुनाच्या प्रकरणातील आरोपी कृष्णा विलास सोनवणे ( वय 29 वर्ष ) राहणार जवळा बाजार  याला पोलिसांनी तांत्रिक तपास करून ड्रोनच्या मदतीने उसाच्या शेतातून अटक केली आहे.

येथील ईदगाह नगर मध्ये प्राथमिक आरोग्य केंद्राच्या कंपाऊंडला लागून असलेल्या घरामध्ये मयत मनोहर बाबू आप्पा साखरे याचा खून करून आरोपीने ईदगाह नगर मधील एका रस्त्यावर प्रेत आणून टाकले होते. याप्रकरणी सर्व वरिष्ठ अधिकाऱ्यांनी घटनास्थळी भेट देऊन पंचनामा केला होता. (Murder Accused Arrested) पोलिसांनी याप्रकरणी तपासासाठी चार पथके तैनात केली होती. आरोपी विरुद्ध कलम 302 व १०३ अन्वये गुन्हा  दाखल करण्यात आला होता.

आरोपी एका उसाच्या शेतात लपून बसल्याचे मोबाईल लोकेशन वरून आढळून आल्याने नेमका माग  काढण्यासाठी पोलिसांनी ड्रोन ची मदत घेऊन छापा टाकून आरोपीला अटक केली. अटक केल्यानंतर आरोपीला औंढा येथील न्यायालयात हजर करण्यात आले. सायंकाळपर्यंत आरोपीची पोलीस कोठडी घेण्याची प्रक्रिया सुरू होती. (Murder Accused Arrested) औंढा नागनाथ पोलीस ठाण्याचे निरीक्षक गणपत राहिरे यांच्या मार्गदर्शनाखाली जवळाबाजार पोलीस चौकीचे सहाय्यक पोलीस निरीक्षक कैलास भगत व त्यांच्या कर्मचाऱ्यांनी ही मोहीम फत्ते केली.