मी आधीच चार खून केले आहेत, पुढचा नंबर तुझा आहे, अशी धमकी देत प्रवाशांमध्ये भीतीचे वातावरण निर्माण केले.
काही काळ लोकलमध्ये तणावाचे वातावरण; प्रवाशांच्या सुरक्षेचा प्रश्न पुन्हा ऐरणीवर
मुंबई (Commuter Safety) : पनवेल ते छत्रपती शिवाजी महाराज टर्मिनस (सीएसएमटी) दरम्यान धावणाऱ्या लोकल ट्रेनमध्ये मद्यधुंद अवस्थेतील एका व्यक्तीने धिंगाणा घालत प्रवाशांना धमकावल्याची धक्कादायक घटना घडली. या प्रकारामुळे काही काळ लोकलमध्ये तणावाचे वातावरण निर्माण झाले.
मिळालेल्या माहितीनुसार, संबंधित व्यक्ती मोठ्याने शिवीगाळ करत प्रवाशांशी वाद घालत होता. यावेळी त्याने "मी आधीच चार खून केले आहेत, पुढचा नंबर तुझा आहे," अशी धमकी देत प्रवाशांमध्ये भीतीचे वातावरण निर्माण केले.
या घटनेदरम्यान मद्यधुंद व्यक्ती आणि काही प्रवाशांमध्ये शाब्दिक वादही झाला. त्यामुळे काही काळ तणाव निर्माण झाला होता. मात्र, अखेरीस परिस्थिती नियंत्रणात आणण्यात आली.
या घटनेनंतर मुंबई उपनगरीय लोकलमधून प्रवास करणाऱ्या प्रवाशांच्या सुरक्षेचा मुद्दा पुन्हा एकदा ऐरणीवर आला असून, अशा घटनांवर आळा घालण्यासाठी रेल्वे प्रशासनाने अधिक प्रभावी सुरक्षा उपाययोजना करण्याची मागणी प्रवाशांकडून होत आहे.