गव्हा परिसरात अवकाळी पाऊस व गारपीटामुळे शेतकऱ्यांना मोठे नुकसान

मानोरा (Unseasonal Rain) : तालुक्यातील मौजे गव्हा शिवारात दि. २१ मार्च रोजी सायंकाळच्या ३ वाजताच्या सुमारास अचानक झालेल्या अवकाळी पाऊस व गारपीटमुळे शेतकरी अशोक प्रभू राठोड यांच्या शेत सर्व्हे नंबर ६८ मधील शेतातील जमा केलेला हरभरा व शेतातील उभे पीक गव्हाचे अतोनात नुकसान झाले आहे. महसूल विभागाने पंचनामा करून नुकसान भरपाई देण्याची मागणी बाधीत शेतकरी कुटुंबाकडून केली जात आहे. 

सविस्तर असे की, शुक्रवारी ( दि. २१ मार्च ) रोजी सकाळपासून कडक ऊन तापत होते. दुपारच्या सुमारास अचानक वातावरणात बदल झाला व कमी प्रमाणात (Unseasonal Rain) अवकाळी पावसाने हजेरी लावली. त्यानंतर गारा पडायला सुरुवात झाली. सुमारे २० मिनिटे बोरा एवढ्या गारपीट झाली. या गारांचा जमिनीवर अक्षरशः सडा पडल्या. या गारपिटीत शेतकरी अशोक राठोड यांच्या शेतातील दोन एकर जमिनीवरील जमा केलेला हरभरा व अडीच एकर शेतातील उभे गहू पिकांचे अतोनात नुकसान झाले. गारपिटीच्या मारामुळे गहू पीक आडवे पडले आहे. 

तालुक्यातील गव्हा, विठोली व चाकुर परिसरात शुक्रवारी अचानक अवकाळी पाऊस (Unseasonal Rain) व गारपीट झाल्यामुळे काढणीला आलेले गहू, हरभरा आदीसह संत्रा, लिंबू, आंबा, कांदा व फळबाग पिकांचे मोठ्या प्रमाणात नुकसान झाले आहे. शासनाने प्रशासनाला नुकसानीचे पंचनामा करून नुकसान भरपाई देण्याची मागणी बाधीत शेतकऱ्यांमधून होत आहे.