हिंगोलीत सुसाट वाऱ्यासह अवकाळीचा तडाखा

अनेक भागांत वीज पुरवठा खंडित; रब्बी पिकांचे मोठे नुकसान

हिंगोली (Unseasonal Rain ) : हिंगोली शहर आणि परिसरात आज अचानक आलेल्या सुसाट वाऱ्यासह आणि विजांच्या कडकडाटासह अवकाळी पावसाने जोरदार हजेरी लावली. गेल्या काही दिवसांपासून उकाड्याने हैराण झालेल्या नागरिकांना या पावसामुळे गारवा मिळाला असला, तरी सोसाट्याच्या वाऱ्यामुळे जनजीवन मात्र पूर्णपणे विस्कळीत झाले आहे.

वादळी वाऱ्याचा मोठा तडाखा
हिंगोली जिल्ह्यातील वसमत, कळमनुरी आणि आखाडा बाळापूर परिसरात वादळी वाऱ्याचा (Unseasonal Rain) जोर सर्वाधिक होता. वाऱ्याच्या प्रचंड वेगामुळे अनेक ठिकाणी झाडे उन्मळून पडली असून काही घरांवरील पत्रे उडून गेल्याच्या घटनाही समोर आल्या आहेत. विशेषतः ग्रामीण भागात काढणीला आलेल्या पिकांना या वाऱ्याचा मोठा फटका बसला आहे.

शहरासह ग्रामीण भाग अंधारात
पाऊस सुरू होण्यापूर्वीच सुरू झालेल्या सुसाट वाऱ्यामुळे महावितरणच्या वीज वाहिन्यांवर झाडे पडल्याने आणि तांत्रिक बिघाड झाल्याने खबरदारीचा उपाय म्हणून अनेक भागांचा वीज पुरवठा खंडित करण्यात आला आहे. (Unseasonal Rain) हिंगोली शहरासह परिसरातील अनेक गावे रात्रभर अंधारात गुडूप होती. वीज पुरवठा पूर्ववत करण्यासाठी महावितरणचे कर्मचारी युद्धपातळीवर प्रयत्न करत आहेत.

शेतकऱ्यांच्या पिकांचे नुकसान
या अवकाळी पावसाने शेतकऱ्यांच्या तोंडचा घास हिरावला आहे. काढणीला आलेला गहू, ज्वारी आणि हरभरा या पिकांचे मोठ्या प्रमाणावर नुकसान झाले आहे. तसेच आंबा बागांनाही या वादळाचा मोठा तडाखा बसला असून फळांची मोठ्या प्रमाणात गळती झाली आहे. बाजार समितीमध्ये उघड्यावर असलेली हळद आणि इतर धान्यही पावसामुळे भिजल्याने शेतकऱ्यांमध्ये चिंतेचे वातावरण पसरले आहे.

हवामान विभागाचा अंदाज
येत्या २४ ते ४८ तासांत मराठवाड्यात काही ठिकाणी अशाच प्रकारे ढगाळ वातावरण आणि हलक्या ते मध्यम स्वरूपाच्या पावसाची (Unseasonal Rain) शक्यता हवामान विभागाने वर्तवली आहे. त्यामुळे नागरिकांनी सतर्क राहावे आणि विजांच्या कडकडाटाच्या वेळी सुरक्षित ठिकाणी आश्रय घ्यावा, असे आवाहन प्रशासनाकडून करण्यात आले आहे. दरम्यान सिद्धेश्वर धरण व डिग्रस कराळे जलशुद्धीकरण केंद्राजवळ झालेल्या वादळी वाऱ्याने वीजपुरवठा खंडित झाला त्यामुळे हिंगोली शहराला 31 मार्चला होणारा पाणीपुरवठा विस्कळीत होण्याची शक्यता वर्तवली जात आहे. त्यामुळे नागरिकांनी पाण्याचा जपून वापर करावा असे आवाहन देखील नगरपालिका पाणीपुरवठा विभागातर्फे करण्यात आले आहे.