आखाडा बाळापूर (Farmer motor pump cable theft) : आखाडा बाळापूर पोलीस स्थानक हद्दीतील देवजना शिवारात चोरट्यांनी धुमाकूळ घालत एकाच रात्रीत तब्बल १४ शेतकऱ्यांच्या पाणबुडी मोटारपंपच्या तांब्याच्या केबल कापून लंपास केल्या. कयाधू नदीपात्रात पाण्यात टाकलेल्या मोटारपंपच्या केबल चोरीस गेल्याने शेतकरी हवालदिल झाले असून, या प्रकरणी आखाडा बाळापूर पोलीस ठाण्यात अज्ञात चोरट्यांविरुद्ध गुन्हा दाखल करण्यात आला आहे.
१९ मे रोजी सायंकाळी साडेसात वाजण्याच्या सुमारास ही घटना उघडकीस आली. शेतकरी सदानंद रामराव कल्याणकर यांच्या मोटारपंपची ३२० फूट लांबीची, ६४०० रुपये किमतीची केबल चोरीस गेली. त्याचप्रमाणे रामराव भुजंगराव कल्याणकर यांची १५० फूट, ३००० रु., भुजंगराव विठ्ठल कल्याणकर यांची १५० फूट, ३००० रु., विठ्ठलराव भुजंगराव कल्याणकर यांची १०० फूट, २००० रु., विलास भुजंगराव कल्याणकर यांची १०० फूट, २००० रु. आणि विलास बाबुराव सावंत यांची २०० फूट, ४००० रु. किमतीची केबल चोरट्यांनी कापून नेली.
याशिवाय संतोष किशनराव कल्याणकर यांची १२० फूट, २४०० रु., गोविंद नथुराम कल्याणकर यांची १५० फूट, ३००० रु., कैलास कल्याणकर यांची १०० फूट, २००० रु., दीपक कल्याणकर यांची १५० फूट, ३००० रु., साहेबराव शिंदे यांची १५० फूट, ३००० रु., शेषराव कल्याणकर यांची १५० फूट, ३००० रु., बाबुराव कल्याणकर यांची १५० फूट, ३००० रु., मारोती कल्याणकर यांची १०० फूट, २००० रु. आणि पंजाबराव कल्याणकर यांची १४० फूट, २८०० रु. किमतीची केबलही चोरीस गेली आहे. एकूण १४ शेतकऱ्यांचे मिळून शेकडो फूट लांबीचे आणि हजारो रुपये किमतीचे केबल चोरट्यांनी लंपास केले.
देवजना परिसरात सातत्याने चोरीच्या घटना घडत आहेत. मात्र एकाच दिवशी १४ शेतकऱ्यांचे नुकसान झाल्याने शेतकऱ्यांमधून तीव्र संताप व्यक्त होत आहे.