एअर ट्रॅफिक सिस्टीममध्ये बिघाड; १,००० हून अधिक उड्डाणे रद्द, हजारो प्रवासी अडकले
लंडनमधील प्रसिद्ध हिथ्रो विमानतळावर झालेल्या मोठ्या सायबर हल्ल्यामुळे ब्रिटनमधील हवाई वाहतूक व्यवस्थेला मोठा फटका बसला आहे. या घटनेनंतर विमानसेवा विस्कळीत झाली असून अनेक उड्डाणांना १० ते १२ तासांचा विलंब होत आहे. या गोंधळाचा परिणाम महाराष्ट्राचे उपमुख्यमंत्री एकनाथ शिंदे यांच्या कार्यालयातील अधिकाऱ्यांवरही झाला आहे.
पुरस्कार सोहळ्यासाठी लंडनला गेलेल्या उपमुख्यमंत्री एकनाथ शिंदे यांच्या कार्यालयातील ओएसडी आणि फोटोग्राफरसह सहा अधिकाऱ्यांचे विमान हिथ्रो विमानतळावर उतरू शकले नाही. त्यामुळे विमान स्वित्झर्लंडमधील झ्युरिककडे वळवण्यात आले. परिणामी हे सहा अधिकारी सध्या झ्युरिकमध्येच अडकले आहेत.
दरम्यान, उपमुख्यमंत्री एकनाथ शिंदे हे ब्रिटिश एअरवेजच्या विमानाने प्रवास करत असून त्यांचे विमान नियोजित वेळेनुसार असल्याची माहिती मिळाली आहे.
मिळालेल्या माहितीनुसार, एकनाथ शिंदे यांच्या ओएसडी आणि फोटोग्राफरसह सहा अधिकाऱ्यांचे विमान हिथ्रो येथे लँडिंग करू शकले नाही. त्यानंतर विमानाचे तातडीने झ्युरिककडे डायव्हर्शन करण्यात आले. लंडनमध्ये सध्या सकाळचे साडेपाच वाजले असून, स्थानिक प्रशासनाकडून या अधिकाऱ्यांना पहाटे सातच्या सुमारास लंडनला आणण्यासाठी विशेष व्यवस्था केली जात असल्याची माहिती समोर आली आहे.
तांत्रिक बिघाडामुळे ब्रिटनची हवाई वाहतूक विस्कळीत
यूकेमधील एअर ट्रॅफिक कंट्रोल (ATC) यंत्रणेत अचानक तांत्रिक बिघाड झाल्याने विमानसेवेवर मोठा परिणाम झाला आहे. ब्रिटनमधील या संकटाचा परिणाम जगभरातील हवाई वाहतुकीवरही जाणवत आहे.
ब्रिटनची प्रमुख एअर ट्रॅफिक कंट्रोल संस्था असलेल्या 'NATS'च्या सिस्टीममध्ये बिघाड झाल्याने यूकेमधील १५ हून अधिक प्रमुख विमानतळांवरील विमानसेवा ठप्प झाली आहे. या तांत्रिक अडचणीमुळे आतापर्यंत १,००० हून अधिक उड्डाणे रद्द करण्यात आली असून हजारो प्रवासी विविध विमानतळांवर अडकले आहेत.
या अभूतपूर्व परिस्थितीमुळे प्रवाशांना झालेल्या गैरसोयीबद्दल NATS प्रशासनाने अधिकृतपणे माफी मागितली आहे. परिस्थिती पूर्ववत करण्यासाठी तसेच तांत्रिक त्रुटी दूर करण्यासाठी तातडीने प्रयत्न सुरू असल्याचे प्रशासनाकडून सांगण्यात आले आहे.
