दीप्ती शर्माचा आशिया कपमध्ये 'विश्वविक्रम'

भारताची आशिया कपमध्ये विजयी सुरुवातथायलंडचा 94 धावांनी पराभव

दुबई (Deepti Sharma) : भारताची अष्टपैलू खेळाडू दीप्ती शर्माने महिला टी-20 आंतरराष्ट्रीय क्रिकेटमध्ये नवा इतिहास रचला. आशिया कप स्पर्धेतील थायलंडविरुद्धच्या सामन्यात दीप्तीने अवघ्या 1.1 षटकांत तीन बळी घेत एकही धाव दिली नाही. या कामगिरीसह तिच्या नावावर 171 बळी झाले असून ती महिला टी-20 आंतरराष्ट्रीय क्रिकेटमध्ये सर्वाधिक बळी घेणारी गोलंदाज ठरली. यापूर्वी हा विक्रम थायलंडच्या थिपाचा पुथावोंगच्या नावावर होता.

दीप्तीसाठी (Deepti Sharma) हा सामना आणखी विशेष ठरला, कारण ती भारताकडून आपला 150वा टी-20 आंतरराष्ट्रीय सामना खेळत होती. 150 सामन्यांचा टप्पा गाठणारी ती हरमनप्रीत कौर आणि स्मृती मानधनानंतरची भारताची तिसरी महिला क्रिकेटपटू ठरली. या महत्त्वाच्या सामन्यात विक्रमी गोलंदाजी करत तिने आपला आनंद द्विगुणित केला. भारताने प्रथम फलंदाजी करताना 20 षटकांत 159 धावा केल्या. शेफाली वर्माने आक्रमक फलंदाजी करत 36 चेंडूंत नाबाद 64 धावांची खेळी केली. त्यानंतर भारतीय गोलंदाजांनी थायलंडच्या फलंदाजीची दाणादाण उडवली. दीप्ती शर्माने (Deepti Sharma) तीन, तर नंदिनी शर्मानेही तीन बळी घेतले. थायलंडचा डाव अवघ्या 65 धावांत आटोपला आणि भारताने तब्बल 94 धावांनी विजय मिळवत आशिया कप मोहिमेची दमदार सुरुवात केली.

दीप्तीच्या (Deepti Sharma) विक्रमाचे आणखी एक वैशिष्ट्य म्हणजे तिने तीन बळी घेताना एकही धाव दिली नाही. महिला टी-20 आंतरराष्ट्रीय क्रिकेटमध्ये तीन किंवा त्यापेक्षा अधिक बळी घेत एकही धाव न देण्याच्या कामगिरीच्या यादीत स्थान मिळवणारी ती पहिली भारतीय गोलंदाज ठरली. तिच्या सातत्यपूर्ण कामगिरीमुळे भारताच्या टी-20 संघातील तिचे महत्त्व पुन्हा अधोरेखित झाले आहे.

दीप्तीने (Deepti Sharma) 2016 मध्ये टी-20 आंतरराष्ट्रीय क्रिकेटमध्ये पदार्पण केले होते. गेल्या दशकभरात तिने फलंदाजी आणि गोलंदाजी या दोन्ही विभागांत भारतासाठी महत्त्वाची भूमिका बजावली आहे. थायलंडविरुद्धच्या सामन्यातील विक्रमी कामगिरीमुळे तिचे नाव आता महिला टी-20 क्रिकेटमधील सर्वोत्तम गोलंदाजांच्या यादीत अग्रस्थानी आले आहे.