भाषेचा आदर करा, राजकारण नको: अखिलेश यादव

नवी दिल्ली (Akhilesh Yadav) : मुंबईतील रिक्षाचालकांसाठी मराठी भाषेचे ज्ञान अनिवार्य करण्याच्या मुद्द्यावर समाजवादी पक्षाचे अध्यक्ष अखिलेश यादव यांनी भाजपवर टीका केली. प्रत्येक राज्याच्या मातृभाषेचा आदर आणि संवर्धन झाले पाहिजे; मात्र भाषेचे राजकारण करू नये, असे त्यांनी म्हटले.

भाषेची सक्ती केल्यास देशाच्या भाषिक आणि भावनिक एकतेवर परिणाम होऊन नागरिकांमध्ये दुराव्याची भावना निर्माण होऊ शकते, असा दावा यादव यांनी केला. प्रत्येक व्यक्तीला नवीन भाषा तातडीने शिकणे शक्य नसल्याने अशा अटींमुळे कष्टकरी आणि सर्वसामान्य नागरिकांवर अतिरिक्त दबाव येऊ शकतो, असे ते म्हणाले. देशभर व्यवसाय करण्याचा घटनात्मक अधिकार असताना भाषिक ज्ञानाची सक्ती योग्य आहे का, असा सवाल (Akhilesh Yadav) त्यांनी उपस्थित केला.

परदेशी कंपन्यांनाही अशीच अट लागू केली जाणार का, असा प्रश्न करत त्यांनी भाजपवर मोठ्या कंपन्यांच्या हिताला प्राधान्य दिल्याचा आरोप केला. रिक्षा व्यवसायाशी संबंधित निर्णयांमागे काही आर्थिक हितसंबंध आहेत का, अशी शंकाही त्यांनी व्यक्त केली. भारताची भाषिक विविधता ही देशाची ताकद असून हिंदी, मराठी, गुजराती, तमिळ, तेलुगू, कन्नड, मल्याळम, पंजाबी, सिंधी, काश्मिरी, डोगरी, आसामी, मणिपुरी, मिझो, बोडो, संथाली यांसह विविध भाषांचा आदर केला पाहिजे, असे (Akhilesh Yadav) यादव यांनी सांगितले.