तिरंगा मार्चपूर्वी दोघांना घेतले होते ताब्यात; दीपके यांच्यावर BNS कलम १२६ आणि १७० अंतर्गत प्रतिबंधात्मक कारवाई, विशेष कार्यकारी दंडाधिकाऱ्यांसमोर हजर करणार
नवी दिल्ली : कॉक्रोच जनता पार्टीचे (CJP) संस्थापक अभिजीत दीपके यांच्या अडचणी वाढल्या असून, दिल्ली पोलिसांनी त्यांना अटक केली आहे. त्यांच्याविरोधात भारतीय न्याय संहितेच्या (BNS) कलम १२६ आणि १७० अंतर्गत प्रतिबंधात्मक कारवाई सुरू करण्यात आली आहे. अटकेनंतर आज त्यांना विशेष कार्यकारी दंडाधिकाऱ्यांसमोर हजर केले जाणार आहे. दरम्यान, ऑल इंडिया स्टुडंट्स असोसिएशनच्या राष्ट्रीय अध्यक्षा नेहा बोरा यांना दिल्ली पोलिसांनी सोडून दिले आहे. दिल्ली पोलीस कायद्याच्या कलम ६५ अंतर्गत आवश्यक औपचारिक प्रक्रिया पूर्ण केल्यानंतर त्यांची सुटका करण्यात आली.
तिरंगा मार्चपूर्वी पोलिसांची कारवाई
अभिजीत दीपके आणि नेहा बोरा या दोघांनाही दिल्लीतील प्रस्तावित तिरंगा मार्चपूर्वी पोलिसांनी ताब्यात घेतले होते. मुख्य निवडणूक आयुक्त ज्ञानेश कुमार यांच्या राजीनाम्याची मागणी तसेच CJP नेते आशुतोष रांका आणि सौरव दास यांच्या अटकेच्या निषेधार्थ पक्षाने शुक्रवारी दिल्लीत तिरंगा मार्च आयोजित केला होता.
या मार्चदरम्यान सेंट्रल पार्क येथे तिरंगा फडकवण्यासाठी दिल्ली पोलिसांनी केवळ ११ जणांना परवानगी दिली होती. मार्चसाठी निघण्याच्या काही वेळ आधी अभिजीत दीपके यांना ताब्यात घेण्यात आले. त्यानंतर नेहा बोरा यांच्यावरही पोलिसांनी कारवाई केली होती.
अभिजीत दीपके यांना तिहार तुरुंगात पाठवणार?
दीपके यांना अटक झाल्यानंतर त्यांना न्यायालयीन कोठडी सुनावली जाणार का आणि त्यांची रवानगी तिहार तुरुंगात होणार का, याबाबत चर्चा सुरू झाली आहे. याआधी जंतर मंतर येथे आंदोलन सुरू असताना CJP नेते आशुतोष रांका आणि सौरव दास यांना पोलिसांनी अटक केली होती. न्यायालयाने या दोघांना पाच दिवसांची न्यायालयीन कोठडी सुनावली होती.
आता अभिजीत दीपके यांना विशेष कार्यकारी दंडाधिकाऱ्यांसमोर हजर केले जाणार असल्याने, त्यांच्या प्रकरणात काय निर्णय होतो, याकडे लक्ष लागले आहे. रांका आणि दास यांच्याप्रमाणेच दीपके यांच्याबाबतही पुढील कायदेशीर कारवाई काय असेल, हा प्रश्न उपस्थित केला जात आहे.
सुटकेनंतर नेहा बोरांचा पोलिसांच्या कारवाईवर आरोप
पोलिसांनी सोडल्यानंतर नेहा बोरा यांनी माध्यमांशी संवाद साधत कारवाईवर आक्षेप नोंदवला. त्यांच्या म्हणण्यानुसार, देशात कायदा आणि सुव्यवस्थेच्या नियमांचे उल्लंघन होत असून, सामान्य नागरिकांनाही गंभीर गुन्हेगारांप्रमाणे वागणूक दिली जात आहे.
आंदोलनांदरम्यान लोकांना ताब्यात घेण्याची पद्धत या परिस्थितीचे चित्र स्पष्ट करते, असे त्या म्हणाल्या. नागरिकांना दिवसा किंवा संध्याकाळी ताब्यात घेतल्यानंतर रात्रभर पोलीस ताब्यात ठेवले जाते आणि दुसऱ्या दिवशी सकाळी किंवा संध्याकाळी सोडण्यात येते, असा आरोपही त्यांनी केला.
#WATCH | Delhi: AISA National President Neha Bora has been released from detention by the Delhi Police after completion of formal procedures under Section 65 of the Delhi Police Act. She was detained under preventive sections on the evening of October 16. https://t.co/eD2YVqSKUV
— ANI (@ANI) October 17, 2026
महिलांना सूर्यास्तानंतर सोडण्याच्या नियमाचा उल्लेख
नेहा बोरा यांनी नागरिकांना रात्रभर ताब्यात ठेवण्याच्या कायदेशीर आधारावरही प्रश्न उपस्थित केले. कोणत्या कायद्याच्या किंवा सुव्यवस्थेच्या कारणाखाली अशा कारवाईचे समर्थन केले जाऊ शकते, असा सवाल त्यांनी केला.
Delhi: On her detention by Delhi Police, AISA National President Neha Bora says, "...Abhijeet should be released—meaning, of course, I didn't know he was detained. So, he should be released, along with all the other protesters who have been illegally detained. They are ordinary citizens demanding accountability and their right to vote. Carrying out such illegal detentions and keeping people at the police station overnight makes no sense at all."
— IANS (@ians_india) October 17, 2026
विशेषतः महिलांना सूर्यास्तानंतर सोडले जाणे अपेक्षित असल्याचा दावा करत, प्रत्यक्षात तसे घडत नसल्याचे त्यांनी म्हटले. या कारवायांमुळे देशात अराजकता आणि गोंधळाचे वातावरण निर्माण होत असल्याचा आरोपही बोरा यांनी केला.
अभिजीत दीपके यांना अटक झाल्यानंतर होणारी सुनावणी, तर नेहा बोरा यांच्या सुटकेनंतर त्यांनी केलेले आरोप, या दोन्ही घडामोडींमुळे दिल्लीतील तिरंगा मार्च आणि त्यासंदर्भातील पोलीस कारवाई पुन्हा चर्चेत आली आहे.