रांजणगाव शेणपुंजीतील घटनेने खळबळ; मुलाला मारहाण होत असल्याचे पाहून मध्यस्थीसाठी धावलेल्या पिता-पुत्रावर चाकू, टिकाव आणि लाकडी दांड्यांनी हल्ला
छत्रपती संभाजीनगर जिल्ह्यातील वाळूज औद्योगिक वसाहतीत देवीच्या दर्शनावरून निर्माण झालेल्या वादाचे रूपांतर दुहेरी हत्येत झाले. रांजणगाव शेणपुंजी येथील कृष्णानगर परिसरात मध्यरात्री घडलेल्या या घटनेत बाबासाहेब रामदास कीर्तिकर (वय ४३) आणि त्यांचा मुलगा निहाल (वय १७) यांना जीव गमवावा लागला. मुलाला होत असलेली मारहाण थांबवण्यासाठी गेलेल्या वडील आणि भावावर धारदार शस्त्रांनी हल्ला करण्यात आल्याचा आरोप आहे. या प्रकरणी पोलिसांनी पाच संशयित आरोपींना रेल्वे स्थानक परिसरातून ताब्यात घेतले आहे.
मिळालेल्या माहितीनुसार, बाबासाहेब कीर्तिकर हे खासगी वाहनावर चालक म्हणून काम करत होते. त्यांचा मुलगा साहिल हा मध्यरात्री परिसरातील सार्वजनिक देवीच्या मंडपात दर्शनासाठी गेला होता. दर्शन घेऊन घरी परतल्यानंतर घरासमोर थांबण्याच्या कारणावरून राजेंद्र गयचंद आणि त्याचा मुलगा नागेश यांच्याशी साहिलचा वाद झाला. या वादाचे पर्यवसान मारहाणीत झाले. यावेळी साहिलला लाकडी दांड्याने मारहाण करण्यात आली.
साहिलचा आरडाओरडा ऐकून त्याचे वडील बाबासाहेब, भाऊ निहाल आणि कुणाल हे मदतीसाठी घटनास्थळी पोहोचले. त्यांनी हस्तक्षेप करून दोन्ही बाजूंमधील वाद मिटवण्याचा प्रयत्न केला. मात्र, परिस्थिती नियंत्रणात येण्याऐवजी संघर्ष अधिक तीव्र झाला.
आरोपांनुसार, शानो गयचंद हिने घरातून चाकू आणून दिला. त्यानंतर अन्य आरोपींनी लाकडी दांडे आणि टिकावाचा वापर करून हल्ला केला. या दरम्यान नागेशने बाबासाहेब आणि निहाल यांच्यावर चाकूने वार केले. या हल्ल्यात दोघेही गंभीर जखमी झाले. मोठ्या प्रमाणात रक्तस्राव झाल्याने त्यांचा मृत्यू झाला. या घटनेत साहिल आणि कुणाल हेही जखमी झाले असून, त्यांच्यावर छत्रपती संभाजीनगर येथील घाटी रुग्णालयात उपचार सुरू आहेत.
दरम्यान, हल्ल्यानंतर आरोपी हरियाणाच्या दिशेने पळून जाण्याच्या तयारीत असल्याची माहिती पोलिसांना मिळाली. या माहितीच्या आधारे पोलिसांनी रेल्वे स्थानक परिसरात कारवाई केली. यावेळी राजेंद्र, मनोज, नागेश, मानसी आणि शानो गयचंद या पाच जणांना अटक करण्यात आली.
या दुहेरी हत्येप्रकरणी एमआयडीसी वाळूज पोलीस ठाण्यात गुन्हा दाखल करण्यात आला आहे. न्यायालयाने अटक करण्यात आलेल्या आरोपींना २३ ऑक्टोबरपर्यंत पोलीस कोठडी सुनावली आहे. घटनेमागील नेमकी पार्श्वभूमी आणि इतर बाबींचा तपास पोलीस करत आहेत.