शिवसेना लातूर जिल्हाप्रमुखाची गीतातून आनंद दिघेंना स्वरांजली!

उपमुख्यमंत्री एकनाथ शिंदे यांच्या हस्ते गीताचे अनावरण

लातूर : एकनाथ शिंदे यांच्या शिवसेनेचे लातूर जिल्हाप्रमुख सचिन दाने यांच्या संकल्पनेतून निर्माण करण्यात आलेल्या ‘धर्मवीर ठाण्याचा...’ या गीताचे अनावरण धर्मवीर आनंद दिघे यांच्या स्मृतिदिनाचे औचित्य साधून उपमुख्यमंत्री एकनाथ शिंदे यांच्या हस्ते ठाणे येथे करण्यात आले.

आनंद दिघे यांच्या कार्याची आणि विचारांची आठवण करून देण्यासाठी त्यांच्या स्मृतिदिनाच्या निमित्ताने हे गीत तयार करण्यात आले आहे.

शिवसेना लातूर जिल्हाप्रमुख सचिन दाने यांच्या संकल्पनेतून ‘धर्मवीर ठाण्याचा...’ या गीताची निर्मिती करण्यात आली आहे. दिघे यांच्या कार्याचा वारसा आणि त्यांच्या विचारांची प्रेरणा पुढील पिढीपर्यंत पोहोचवण्याचा प्रयत्न या गीतातून करण्यात आला आहे. भगव्याचा स्वाभिमान, शिवसेनेची निष्ठा आणि दिघे यांच्याप्रती असलेली शिवसैनिकांची भावना या गीतातून व्यक्त करण्यात आली आहे.

या गीताला विक्रम कोतवाड यांनी आवाज दिला असून विनायक राठोड यांनी संगीतबद्ध केले आहे. गीतलेखन महादेव ढमने यांनी केले असून, व्ही ट्यून्स संगीत स्टुडिओ, लातूर येथे संगीतनिर्मिती करण्यात आली आहे.

‘धर्मवीर ठाण्याचा...’ हे गीत लवकरच विविध डिजिटल व्यासपीठांवर प्रदर्शित होणार आहे. तसेच व्हिडिओ गीताचीदेखील निर्मिती होणार आहे, असे सचिन दाने यांनी सांगितले.

यावेळी परिवहन मंत्री प्रताप सरनाईक यांच्यासह लातूर जिल्ह्यातील शिवसैनिक व पदाधिकारी उपस्थित होते.